Нæ районы алы мæйы фæстаг сабаты дæр зиуы бонты фæархайынц куыстуæттæ, уагдæттæ, æнæниздзинад хъахъхъæнджытæ, базарадон объекттæ æмæ æндæр кусæндæттæ.
Ивгъуыд сабаты дæр та сыгъдæгдзинады зиуы архайдта бирæ адæм.

Нæ районы администрацийы размæ райсомæй æрæмбырд сты йæ кусджытæ æмæ, сæ хæс базонгæйæ, иутæ ацыдысты Хъобангоммæ цæуæг фæндагмæ. Хъолайы цъитийы раскъуыды фæстæ чи бабын, уыдоны номарæн мемориалон цыртдзæвæны алыварс æркарстой кæрдæг, ныссыгъдæг æй кодтой. Ам бакуыстой 20 адæймаджы, уыдис сæм, кусынæн сæ цы хъуыд, уыдон.
Районы администрацийы сæргълæууæджы хæдивæг Гæбæраты Артуры сæргълæудæй сыгъдæгдзинады зиуы архайджытæ сихорафонтæм рафидауын кодтой мемориалы бынат.
Кусджыты иннæ къорд та Деметы Славикы разамындæй архайдта Октябрыхъæуæй Тарскæмæ цæуæг фæндаджы алывæрсты бырæттæй ныссыгъдæг кæныныл (фыццаг къамы). Цы бырæттæ, згъæлæнтæ æрæмбырд кодтой, уыдон сæрмагонд транспорт аласта æмбæлгæ бынатмæ. Зиуы архайдтой культурæйы, ахуырады, хъæууон хæдзарады, экономикæйы, финансон æмæ иннæ управлениты кусджытæ.
Октябрыхъæуы Культурæйы галуан æмæ библиотекæ дæр фæстейы нæ фæлæууыдысты зиуы боны. Бафснайдтой сæ кусæндæтты алфамбылай (дыккаг къамы).
Ахæм сыгъдæгдзинады бонты фылдæр адæм хъуамæ змæла, бæрнондзинад тынгдæр хъуамæ æнкъарой кусæндæтты, куыстуæтты разамонджытæ, хъæууон администрациты, стæй корпусты æмæ  хисæрмагонд хæдзæртты цæрджытæ дæр.

ГАССИТЫ Моисей.
Авторы ист къамтæ.