Горæтгæрон районы администрацийы агъуысты апрелы 7 бон уыд сылгоймæгты Советы уæнгтæн радон æмбырд. Фембæлдысты 12 хъæуы минæвары Æрхонкæйæ, Уæллаг Санибайæ, Джызæлæй, Тарскæйæ, Михайловскæй, Ирæй, Донгæронæй, Камбилеевкæйæ, Дæллаг Санибайæ, Комгæронæй, Ногирæй, Сунжæйæ.

Сæрдариуæг дзы кодта Михайловскы ссæдзæм рæвдауæндоны разамонæг Чысиаты Людмилæ. Уый ахсджиагæй æрдзырдта абоны æнæнцой уавæры тыххæй, архайджыты сæрмагондæй базонгæ кодта, цы бирæвæрсыг куысты пълан бацæттæ кодта, уыимæ æмæ боны фæткы фарстатимæ. Бæстонæй сын ныффæдзæхста, цæмæй сæ алчидæр зæрдиагæй бавнала æмæ парахат кæна йæ хъæубæсты рæзгæ фæлтæры 'хсæн патриотон хъомылады фарстатæ.

Рауад ма дзы æхсызгон цымыдисаг цау дæр. Сыроежкæ Людмилæ у Архонкæйы сылгоймæгты советы сæрдар. Ноджы ма къорд азты цæсгомджынæй кусы 16-æм рæвдауæндоны хистæр хъомылгæнæгæй. Уымæ гæсгæ йын саккаг кодтой паддзахадон хæрзиуæг. Бирæ рæсугъд арфæтимæ, залы къухæмдзæгъдимæ, стæй зæрдылдарæн лæвæрттимæ хорзæх сæмбæлд йæ хицауыл.

Æмбырдмæ хуынд æрцыд Горæтгæрон районы "Ныхас"- ы сæрдар Дзуццаты Валери. Уый биноныгæй æрдзырдта нæ фыдæлтæй баззайгæ традицитæ æмæ æгъдæуттыл, уыдон фæстæмæ раздахын æмæ сæ рæдауæй рæзгæ фæлтæрмæ хæццæ кæнын. Валери фæнд бахаста, цæмæй "Ныхас" æмæ Сылгоймæгты совет кусой æмзондæй, уа сын хъомысджын цæдис сæ дарддæры куысты.

Уæд æппæт зæххы къорийыл Сабырдзинад!

 МÆРГЪИТЫ-ДУДАЙТЫ Фатимæ.