Горæтгæрон район дæр сбæрæг кодта Ирон æвзаг æмæ литературæйы бон. Уый у æппæт Ирыстоны уарзондæр бæрæгбон, нæ мæсыг, æмæ фидарæй фидардæр кæнæд.

Нæ адæм фæлтæрд сты царды зынты. Знæгтæ нæ цагътой, гæбазгай фæйнæрдæм тыдтой зæхх. Иу адæм ныддихтæ сты хæхты цъассыты, комæй-коммæ нæ уыди фæндаг, нал уыд паддзахад, фæлæ нын баззад æнусон фарн - мадæлон æвзаг. Уый нæ уромынц хæхтæ æмæ арæнтæ, уый фæрцы зонæм кæрæдзи, нæ фыдæлты. Арфæйы ирон дзырд нæ скодта цардаразæг адæм.

Нæ районы администрацийы культурæйы æмæ ахуырады управленитæ хорз мадзал бацæттæ кодтой Ирон æвзаджы бонмæ сконд æрцыд Культурæйы галуаны. Ардæм бирæ адæм æрбацыд - скъоладзаутæ, сабидæтты хъомылгæнинæгтæ, ахуыргæнджытæ, ныййарджытæ, æхсæнадон организациты минæвæрттæ.

Мадзал амыдтой Культурæйы галуаны методисттæ Медойты Аслан æмæ Гæджиты Мурат.

Сценæйыл аивæй зынд, Хетæгкаты Къостайы æнæмæлгæ, зынаргъ "Ирон фæндыр" фыццаг хатт мыхуыры куы рацыд 1899 азы, уыцы чиныджы егъау ныв.

Сценæйыл сæ арæхстдзинад фыццаг равдыстой нæ районы скъолаты кæстæркъласонтæ. Уыдон мадæлон æвзагыл дзырдтой æмдзæвгæтæ, зарыдысты. Уый фæстæ та Октябрыхъæуы 15-æм рæвдауæндоны сабитæ рацыдысты сценæмæ. Зæрдæмæдзæугæ рауадысты сæ номыртæ, уæлдайдæр та сæ кадæг "Фæндыр куыд фæзынд".

Азæлыд зынгæ зарæггæнæг Хъуысаты Эльвирæйы хъæлæс.

Сценæмæ фæхуыдтой нæ районы "Ныхас"-ы сæрдар Дзуццаты Валерийы, Сунжæйы хъæуы бындурон скъолайы директор Хуыгаты Æхсары æмæ Цæгат Ирыстон-Аланийы зонад æмæ ахуырады министрады минæвар Нæкуысаты Иринæйы. Уыдон радзырдтой ирон æвзаджы ахадындзинады, йæ фарны, йæ дарддæры райрæзты тыххæй, бузныг загътой ахæм егъау мадзал бацæттæгæнджытæн.

Куыд иннæ азты, афтæ та ныр дæр Ирон æвзаджы бон барæсугъд кодтой Культурæйы галуаны артисттæ: зарæггæнджыты къорд - адæмон инструментты оркестр, кафджыты ансамбль "Арвы арт" Джиоты Светланæйы разамындæй, Джихаты Роман, Хуыгаты Стас, Хуыгаты Ибрагим, Медойты Аслан, фæндырдзæгъдджытæ Коцты Аленæйы разамындæй, Кæркуысты Ларисæ æмæ æндæртæ.

Ирон æвзаджы боны архайджытæ сæ рухс нæмттæ лæугæйæ ссардтой, Украинæйы сæрмагонд æфсæддон операцийы цы фæсивæд бабын Уæрæсейы хæстонтæй, уыдонæн.

Райадминистрацийы ахуырады управленийы хицауы хæдивæг Хъараты Раситæ Кады грамотæтæй схорзæхджын кодта Октябрыхъæуы 15-æм сабидоны хъомылгæнæг Букуылты Зинæйы, ацы сабидоны хъомылгæнинæгты, Сунжæйы скъолайы райдиан кълæсты ахуыргæнæг Джиоты Аленæйы, Сунжæйы хъæуы астæуккаг скъолайы 1 "б" къласы ахуыргæнинæгты.

Райадминистрацийы ахуырады управленийы методист Сугъаты Еленæ æмæ Культурæйы галуаны директор Мæхъиты Хадизæт бузныджы ныхæстæ загътой, мадзал чи бацæттæ кодта, уыдонæн, зæрдæбынæй сæ бафæндыд, цæмæй æнусты тæмæнтæ кала нæ мадæлон æвзаг.

Ацы бæрæгбон ма алкæй зæрдыл æрлæууын кодта: нæй, никуы фесæфдзæн, Къоста, Васо, Секъа, Цоцко, Елбыздыхъо, Цомахъ, Нигер, Гафез, Нафи, Шамил, Камал цы 'взæгтыл дзырдтой æмæ фыстой, уый. Ирон кафт, ирон дзырд абон сæ тыхы сты, æмæ нын алы бон дæр хъуамæ уа Ирон æвзаджы бæрæгбоны хуызæн, цæмæй нæ хъуыды, нæ алы фезмæлд уой ирон, Ирыстоны алы къуымты дæр хъуыса ирон æвзаг. Йæ кад æмæ йæ хъомыс нын бонæй-бонмæ фылдæр кæнæнт. Уый у Къостайы 'взаг - нæ хур, ирондзинады рухс, цырагъ æмæ макуы ахуыссæд!

 

ГАССИТЫ Моисей.