19-æм майы уыд ногдзауты бон. Ацы организаци сырæзт 1922 азы ССР Цæдисы. Хистæр фæлтæр хорз хъуыды кæны, кæддæр сæ ногдзауты рæнхъытæм куыд айстой, сæ хъуыртыл сын сырх галстуктæ куы бастой, уый.

Ныр дæр нæ районы Компарти (Биазырты Фатимæ) ацы боны цытæн мадзал бацæттæ кодта. Конд æрцыд Октябрыхъæуы центры Ленины цыртдзæвæны цур. Ардæм æрбацыдысты коммунисттæ, скъоладзаутæ сæ ахуыргæнджытимæ, æндæр адæм.

Мадзал гом кæнгæйæ Биазырты Фатимæ загъта:

- Нæ æрыгон æмбæлттæ, ахуыргæнджытæ æмæ хъомылгæнджытæ, зынаргъ сабитæ. Ногдзаутæ - уый у хъомылады скъола, æмæ йыл милуангай Советон æмбæстæгтæ рацыдысты. Зын у, Советон Цæдисы фехæлдимæ ацы скъола дæр кæй нал кусы.

Ацы бæрæгбоны мæн раарфæ кæнын фæнды уе 'ппæтæн дæр. Ногдзауты организаци фылдæр кæй кæны, уымæй фæстæмæ рæзы не стыр Райгуырæн бæстæ.

Зынаргъ ногдзаутæ! Уæ ардбахæрд тынг хъæуы абон нæ Райгуырæн зæххы. Зын рæстæг у. Ногдзаутæ уыдысты: зæххы цъарыл фыццаг космонавт Юрий Гагарин, Нобелы премийы лауреат, академик Жорес Алферов, Уæрæсейы компартийы лидер Геннади Зюганов, Фыдыбæстæйы Стыр хæсты хъæбатыртæ. Мах, хистæр фæлтæр, нæ ногдзауты рæстæг мысгæйæ, февзонгдæр вæййæм. Уæ зæрдæтæ уадз æмæ дзаг уой нæ Райгуырæн бæстæмæ уарзондзинадæй, хистæртæн аргъ кæнынæй. Уе 'ппæтæн та мæ фæнды сабырдзинад æмæ амонд.

Уый фæстæ коммунисттæ Биазырты Фатимæ, Дзуццаты Валери, Зассеты Заирæ, Джихаты Роман, Гецаты Лорæ, Сланты Зæлинæ, Токаты Каринæ, Чысиаты Мæирбег, Тотраты Альберт, Багаты Арон, Лалыты Левæ сырх галстуктæ æмæ ногдзауты риуылдаргæ нысантæ бакодтой Октябрыхъæуы 1-аг астæуккаг скъолайы 30 ахуыргæнинагыл.

Чингуытæхæссæн хызын æд ахуыргæнæн æрмæджытæ та радтой Камбилеевкæйы астæуккаг скъолайы ахуырдзау Джусойты Давидæн, иттæг хорз бæрæггæнæнтыл кæй ахуыр кæны, уый тыххæй, айстой йæ ногдзауты рæнхъытæм.

Дзæджыхъæуы ветеранты Советы сæрдар, меценат Лалыты Левæ тынг æххуыс кæны нæ районы мадзæлттæ срæвдз кæнынæн, у æцæг коммунист, æмæ йæ уый тыххæй ацы мадзалы схорзæхджын кодтой ССР Цæдисы сырæзты 100 азы юбилейон майданæй. Бузныджы ныхæстæ загъта Лалыйы-фырт. Уый фæстæ зæлыдысты ногдзауты зарджытæ.

 

ГАССИТЫ Моисей.