Уæрæсейы сæрмагонд æфсæддон операцийы Ирыстонæй чи фæмард, уыцы лæппуты нæмттæ сæнусон кæныныл бацархайдта Елена Сухорукова.

Уый у нывгæнæг æмæ сныв кодта Бестауты Ацæмæз, Роман Горкавенко æмæ Бесаты Русланы портреттæ.

Ростовы облæсты Шахтинскы цы нывты равдыст уыд "Сæрмагонд æфсæддон операцийы Хъæбатыртæ", зæгъгæ, уым кастысты ацы лæппуты нывтæм дæр. Еленæ Уæрæсейы хъуыстгонд у йæ гуманистон æмæ патриотон архайдæй. Ацы равдысты ис 20 адæмыхатты минæвæртты портреттæ.

Бесаты Руслан райгуырд 1986 азы 14 июлы Цхинвалы районы Присы хъæуы. Хицæн рæстæджыты службæ кодта Хуссар Ирыстоны Хъахъхъæнынады министрады, фидауынгæнæг тыхты, фæмард Донбассы.

Бестауты Ацæмæз дæр Присы хъæуы райгуырд, фæмард 2022 азы 13 майы. Йæ амæлæты фæстæ йæ схорзæхджын кодтой майданæй "Фыдыбæстæ хъахъхъæнæгæн".

Роман Горкавенкойыл та цыд 25 азы, уыд Мæздæгæй. Фæмард 2022 азы 5 мартъийы сæрмагонд æфсæддон операцийы рæстæджы Украинæйы. Ныгæнгæ та йæ бакодтой 9 августы 2022 азы.

Нывгæнæг Елена Сухорукова зæгъы, зæгъæ, ацы ирон æфсæддонты цæсгæмттæ куы федта, уæд сæ аивдзинадæй зæрдæ барухс. Уый ма иннæ ирон хъæбатырты портреттæ дæр сныв кæндзæн æмæ сæ равдысты равæрдзæн.

Цы æртæ ирыстойнаг лæппуйы нывтæ скодта, уыдон ма фендзысты Мæскуыйы, Воронежы æмæ Курскы облæстты равдыстыты.

 

ГАССИТЫ Моисей.