Адæймаг йæ хорз хъуыддæгтæй вæййы хъуыстгонд, арфæйаг, уæлдайдæр, адæмы хæрзиуæгæн арæзт куы уой, уæд.

Ахæм зæрдæмæдзæугæ хъуыддаг сарæзта Октябрыхъæуы бынæттон администрацийы сæргълæууæг Пухаты Славик. Уый ацы бынаты куы 'рлæууыд, уæд сфæнд кодта Октябрыхъæуы Уастырджийы кувæндон саразын æмæ йын бантыст. Бынатæн та йын равзæрста, Дзæуджыхъæуæй Октябрыхъæумæ уæллаг трассæйыл чысыл куы æрбацæуай, уæд галиуæрдыгæй фарс рæсугъд, бæрзонд бæлæсты 'хсæн, Тедеты Павелы номыл уынджы. Ацы бынат парчы хуызæн у, æввахс цæрджытæ дзы баулæфынц.

Ивгъуыд къуыри, майрæмбоны, ам фæзынд Уастырджийы цыртдзæвæн,  сæвæрдтой йæ уæлвонг бынаты, æмæ хъæуы хистæртæй сæ иу – Тедеты Руслан, бынæттон администрацийы сæйраг специалист Джергаты Алан æмæ æндæртæ æртæ чъири æмæ ирон бæгæныйæ дзаг кæхцæй акуывтой Стыр Хуыцау, Уастырджи, иннæ Зæдтæ æмæ Дауджытæн, арфæ ракодтой ацы цыртдзæвæн срæвдз кæныныл чи бацархайдта, уыдонæн. Сæрмагонд æфсæддон операцийы архайджытæн, хъæубæстæн, æппæт Ирыстоны адæмы цæрæнбонæн ракуывтой.

Уастырджийы цыртдзæвæны фарсмæ ма сарæзтой агъуыст, фынг æмæ бандæттæ. Ныр ардæм чи цæуа, уыдонæн хуыздæр фадат уыдзæн скувын æмæ ацаходынæн, уæлдайдæр та чындзæхсæвгæнджытæ æмæ куывдгæнджытæн. Ис дзы ног асфальтвæндæгтæ.

Пухайы-фырты фарсмæ æрбалæууыдысты æмæ йын алыхуызон æххуыс бакодтой Хъæцмæзты Роланд, Темырты Батрадз, Гæджынаты Владик, Голоты Вовæ, Туаты Олег, Кæркуысты Гия, Биганаты Шалва, Олисаты Зауыр, хъæубæсты фæсивæд.

Уастырджи ирон адæмæн сæ хъуыддæгты кæддæриддæр æххуысгæнæг уæд!

Бузныг Уастырджийы уаз цыртдзæвæн бацæттæгæнджытæн!

 

ПИСИТЫ Моисей.