Спортуарзджытæ, боксæн табугæнджытæ æнæрхъæцæй æнхъæлмæ кæсынц дунейы чемпион Гасситы Мураты радон тохмæ. Кæд алы æмгъуыдты дзырдæуыд, кæд хæцдзæн, уый тыххæй, уæд ныр бæлвырдæй фæбæрæг: Мураты радон тох уыдзæн ацы аз сентябры æмбисы. Æрмæст бæлвырд бæрæг нæу, йæ ныхмæлæууæг чи уыдзæн уый - кæнæ конгойаг Мартин Баколе, кæнæ та шведаг Отто Валлин.

Куыд зонæм, афтæмæй Гассийы-фырт у  WBA (Дунеон боксы ассоциаци) æмæ IBF (Дунеон боксы федерацийы) чемпион фыццаг уæззау уæзы. Рамбылдта 30 хатты, уыдонæй 23 - нокаутæй, иу хатт та фæхæрд. 29-аздзыд Гасситы Мурат уæззау уæзы хæцын райдыдта 2020 азы фæззæджы. Уый ма фæстаг хатт Ереваны тох кодта америкаг боксер Майк Балогунимæ æмæ йæ дыккаг раунды аппæрста нокаутæй.

Гассийы-фырт ныртæккæ тренеровкæтæ кæны æмæ æнхъæлмæ кæсы, йæ ныхмæлæууæг чи уыдзæн, стæй кæм уыдзæн тох, уымæ. Уый сбæрæг уыдзæн контракт бафыссыны фæстæ.

Отто Валлины хыгъды ис 25 уæлахизы (14 - нокаутæй). Иу хатт фæхæрд (2019 аз) бритайнаг боксер Тайсон Фьюрийæн. Уый фæстæ шведаг фæд-фæдыл рамбылдта 5 хатты.

Конгойаг Мартин Баколе та рамбылдта 19 хатты, 2018 азы фæхæрд Майкл Хантберæн, 2020 азы Баколе фæуæлахиз уæрæсейаг боксер Сергей Кузьминыл.

Бирæ рæстæг нал ис сентябры мæйы æмбисмæ, æмæ Муратæн нæ зæрдæ зæгъы уæлахиз!

ГАССИТЫ Моисей.