Цӕгат Ирыстоны ӕрӕджы мыхуыры рацыд "Ирон Нартиадӕйы энциклопеди". Уыдис ын презентаци, ӕмӕ йын стыр аргъ скодтой ахуыргӕндтӕ, фысджытӕ, нӕ интеллигенцийы минӕвӕрттӕ, чиныгкӕсджытӕ.

Чиныг саразыны фӕнд фӕзынд зындгонд историк ӕмӕ ахуыргонд, историйы зонӕдты доктор, этнограф, Цӕгат Ирыстоны Абайты Васойы номыл гуманитарон ӕмӕ социалон иртасӕн институты этнологийы хайады сӕргълӕууӕг Цыбырты Людвигмӕ.

"Ирон Нартиадӕйы энциклопеди"-йыл куыстой историктӕ, фольклористтӕ, этнографтӕ, литератортӕ, философтӕ, социологтӕ, ӕндӕр иртасджытӕ. Нарты кадджытӕ дзы ӕвӕрд сты дамгъуатмӕ гӕсгӕ. Автортӕ канд Ирыстонӕй не сты, фӕлӕ ма Цӕгат Кавказ ӕмӕ Уӕрӕсейӕ дӕр.

Энциклопеди арӕзт у ӕртӕ гуырахстджын чиныгӕй. Мыхуыры рацыд Цыбырты Людвиджы 90 азы юбилеймӕ.

Цыбыры-фырт ацы чингуытӕ йӕ къухфыстимӕ балӕвар кодта Мӕздӕджы, Ӕрыдоны, Алагиры, Рахизфарсы, Дыгуры, Кировы районты, Дзӕуджыхъӕуы центрон библиотекӕтӕн. Ӕз ныхас кодтон Горӕтгӕрон районы центрон библиотекӕйы директор Къӕбулты Галинӕимӕ, ӕмӕ мын афтӕ радзырдта:

- Цыбырты Людвиг махӕн дӕр радта ацы чингуытӕй. Ныртӕккӕ сты нӕ библиотекӕйы. Уыдонӕй уӕлдай нын арфӕтимӕ балӕвар кодта, йӕ райгуырды 90 азы цытӕн мыхуыры цы чиныг рацыд, уый дӕр. Чингуытӕ нӕ библиотекӕмӕ ӕрбахастам дыууӕ къуырийы размӕ.

Нӕ библиотекӕйы кусджыты ӕмӕ чиныгкӕсджыты номӕй бузныг зӕгъын хъуыстгонд ахуыргонд Цыбырты Людвигӕн йӕ лӕвӕртты тыххӕй.

ГАССИТЫ Моисей.