Горӕтгӕрон районы  Дӕллаг Санибайы хъӕуы къорд азы размӕ ног астӕуккаг скъолайы арӕзтад ӕгӕр ныддӕргъвӕтин. Эксплуатацимӕ йӕ радтыны хъуыддаг фӕстӕмӕ-фӕстӕмӕ цыд.

Уӕ Цӕгат Ирыстоны республикӕйы сӕргъы ӕрлӕууыд Ӕгъуызарты Тамерлан ӕмӕ ацы хабар куы базыдта, уӕд ӕвӕстиатӕй бахӕс кодта ӕмбӕлгӕ ведомствӕтӕн, цӕмӕй цыбыр рӕстӕгмӕ скъола кӕронмӕ арӕзт фӕуыдаид. Ӕмё сцӕттӕ 2-уӕладзыгон астӕуккаг скъола Дӕллаг Санибайы. Рухсаг уӕд Ӕгъуызары-фырт - ныр ацы скъола хӕссы  йӕ ном.

Куыд иннӕ ахуыргӕнӕн уагдӕтты, афтӕ ам дӕр ног ахуыры азмӕ цалцӕджы куыстытӕ райдыдтой,    куыддӕр дзы сӕрдыгон лагеры ахуыргӕнинӕгты улӕфты рӕстӕг дыууӕ радӕй ахицӕн, афтӕ. Ахуыргӕнджытӕ, техникон кусджытӕ ам косметикон цалцӕггӕнӕн куыстытӕ райдыдтой 20 июлы ӕмӕ сӕ кӕронмӕ фесты 10 августы.

Ног цалцӕгӕй рӕсугъд рафидыдтой хӕрӕндон, астӕрдтӕ, тыргътӕ, кълӕстӕ, асинтӕ, кӕрт.

- Кӕй зӕгъын ӕй хъӕуы, нӕхи тыхтӕй бакодтам ацы куыстытӕ ӕртӕ къуырийы дӕргъы, иууылдӕр хорз бакуыстам. Нӕ бюджетмӕ нын Горӕтгӕрон районы администраци ахыгъта 48 мин сомы, ӕмӕ дзы балхӕдтам ахорӕнтӕ, чъыр, ӕндӕр ӕрмӕджытӕ, кусӕн мигӕнӕнтӕ. Ӕхцайы фӕрӕзтӕ бахардз кодтам хӕдзардзинӕй.

Ис нӕм хӕрӕндон, ӕмӕ нын уымӕн та рахицӕн кодтой 96 мин сомы. Балхӕдтам дзы фынгтӕ, бандӕттӕ, хӕрӕндоны кусӕн мигӕнӕнтӕ ӕмӕ ацы хъуыддаджы дӕр ницӕуыл      тыхсӕм. Ацы аз нӕм ахуыр кӕндзӕн 165 скъоладзауы, семӕ кусдзысты 17 ахуыргӕнӕджы. Раст зӕгъын хъӕуы, географийы ахуыргӕнӕг нӕм нӕй, фӕлӕ архайдзыстӕм йӕ самал кӕныныл. Скъоладзаутён байуёрстам ёмё ма ноджыдёр байуардзыстём ахуыргӕнӕн чингуытӕ, фаг нын уыдзысты.

Уӕдӕ ног ахуыры азмӕ нӕхи ӕппӕт ӕгъдауӕй дӕр кӕй бацӕттӕ кодтам, уый нын нӕ дарддӕры куыст фенцондӕр кӕндзӕн, - зӕгъы Дӕллаг Санибайы иумӕйагахуырадон астӕуккаг скъолайы директор Доййаты Иринӕ.

ГАССИТЫ Моисей.