Фыццаг бынат
Нæ районы Сунжæйы хъæуы Культурæйы хæдзары цалдæр ансамблы ис, семæ драмон театр дæр. Уыцы къордтæй иу у гуымсæгæй цæгъдджыты ансамбль, йæ къухдариуæггæнæг – Засеты Леван. Ансамблы ис 12 лæппуйы: Джиоты Аслан, Хуыгаты Арсен, Къæбысты Давид, Цоциты Хетæг, Пæрæстаты Зауыр, Сланты Тамерлан, Икъоты Рустам, Тедеты Владислав, Хацырты Олег, Дзæгъиаты Тамерлан, Цæгæраты Сæрмæт, Козаты Сæрмæт. Арæх барухс кæнынц сæ аивадæй адæмы зæрдæтæ алыхуызон фестивальты, æвдыстыты, бæрæгбæтты. Бацахсынц раззагдæр бынæттæ.
Æрæджы ацы ансамбль фæхуыдтой Кæсæг-Балхъары сæйраг горæт Налцыкмæ фестиваль "Кавказы адæмты кæфтыты æхсæнадæмон чемпионат"-мæ. Сунжæйаг фæсивæд дзы хорз арæхстдзинад равдыстой: райстой Гранпри, ноджы ма сын жюри саккаг кодта фыццаг бынат, æмæ уæлахиздзаутæй æрыздæхтысты.
Ныр та ансамбль фæхуыдтой Дагестанмæ. Уым арæзт цæуы Расул Гамзатовы райгуырды 100 азы цытæн аивадон фестиваль "Урс хърихъуппытæ". Ныфс нæ ис, ам дæр та нæ ирон лæппутæ кæй фесгуыхдзысты.
Сунжæйы Культурæйы хæдзары разамынд æмæ ансамблы коллектив бузныг зæгъынц се 'мхъæуккаг Руслан Гамхетовæн, йæхи сæрмагонд машинæйыл сæ Налцыкмæ æмæ фестæмæ кæй аласта, уый тыххæй. Афтæ арæх бакæны, ныр ын фыццаг хатт нæу.
Мах та нæ бирæнымæц газеткæсджыты номæй арфæ кæнæм ацы ансамблæн, фестивалы фыццаг бынат кæй бацахста, уый тыххæй.
ГАССИТЫ Моисей