Кæд уыдзæн ирон адæмы съезд?
Æндæрæбон, 19 декабры, уыдис Æппæтдунеон æхсæнадон змæлд "Иры Стыр Ныхас"-ы Координацион советы æмбырд. Амыдта йæ советы сæрдар Уататы Зелим.
Боны фæткы цы бирæ фарстатæ уыд, уыдонæй иу – ирон адæмы радон 11-æм съезд ауадзын. Уый та уыдзæн 2024 азы апрелы мæйы Цæгат Ирыстоны Тæбæхсæуты Балойы номыл ирон академион театры бæстыхайы. Съезды Горæтгæрон районæй архайдзæн 50 делегаты, иууыл иумæ та – 570, уыдонимæ Уæрæсейы æмæ фæсарæнты ирон диаспорæтæй, æндæр хуынд адæм.
Координацион совет Иры Стыр Ныхасы сæрдары хæдивæгæй æмхъæлæсæй сæвзæрста Зæгъойты Вячеславы, секретарæй та – Уруймæгты Людмилæйы. Стæй сфидар кодта Иры Стыр Ныхасы хæрзиуæг "Арфæ". Промышленнон районы Ныхасы сæрдар Дыгъуызты Алыксандр хорзæхджын æрцыд ацы организацийы Кады гæххæттæй, Æрæфы районы Ныхасы сæрдар Хасцаты Тазретæн та радтой РЦИ-Аланийы Парламенты Кады грамотæ.
Нæ республикæйы ирон ныййарджытæй чидæртæ сæ сывæллæтты скъолайы ирон æвзаг ахуыр кæнын кæй нæ уадзынц, уый тыххæй æмбырд райста Сидт. Фидаргонд æрцыд съездмæ бацæттæ кæныны организацион комитет.
Газет "Стыр ныхас" фидæн азы республикæйы районтæ цал экземпляры хъуамæ рафыссой, уый тыххæй информаци бацæттæ кодта Иры Стыр Ныхасы сæрдары хæдивæг Туаты Руслан. Æмбырды архайджытæ ма сфидар кодтой комитеттæ. Дзырд цыд æндæр фарстатыл дæр. Байхъуыстой Мыггæгты комитеты сæрдар Æгкацаты Юрийы хыгъдмæ.
Раныхас ма кодтой Горæтгæрон районы Ныхасы сæрдар Дзуццаты Валери, Иры Стыр Ныхасы Хуссар Ирыстоны хайады сæрдар Гаглойты Роберт, йæ хæдивæг Хъоцыты Алвери, Сылгоймæгты комитеты сæрдар Махъоты Иринæ, Æгъдæутты комитеты сæрдар Моргуаты Эдислав æмæ æндæртæ.
ГАССИТЫ Моисей