Комгæроны Культурæйы хæдзар раджы байгом кодта йæ дуæрттæ хъæубæсты адæмæн. Ам уæдæй абонмæ уæвынад кæны библиотекæ. У Горæтгæрон районы центрон библиотекæйы филиал.

Ныр 25 азы дæргъы йæ разамонæг у Джыккайты Неля. Чиныгкæсджытæн сси уарзон, аргъ ын кæнынц.

Библиотекæйы чингуыты нымæц у 7 мины. Ис дзы алыхуызон литературæ – аивадон, сывæллæтты, бæстæзонæн, методикон, историон, бæрæгуатон. Сты тæрхджытыл аив æвæрд, цы литературæмæ хауынц, уый нысанимæ. Районы центрон библиотекæ йын æрæджы йæ фонд фæфылдæр кодта ног энциклопедитæ æмæ сывæллæтты литературæйæ.

Æрвылбон дæр ардæм æрбацæуы 25–30 чиныгкæсæджы, сæ фылдæр – ацæргæ адæм æмæ хъæуы астæуккаг скъолайы ахуыргæнинæгтæ. Активондæр чиныгкæсджытæ дзы сты Гæбæраты Соня, Хъесаты Ленæ, Букуылты Лизæ æмæ æндæртæ. Фылдæр кæсынц ирон аивадон литературæ.

Библиотекæйы ис хицæн къуым Хетæгкаты Къостайæн. Неля æрæмбырд кодта рагон ирон хæдзарон мигæнæнтæ, дзаумæттæ æмæ сæ сарæзта хицæн къуым "Фыдæлты уæзæг" (къамы). Ис дзы пирæн, галуæрдон, нымæтхуд, дурынтæ, хосы, зæхкуысты мигæнæнтæ, иууыл иумæ 30 хуызы.

Библиотекæ у райдзаст, хъарм, ис дзы хорз уавæртæ чиныгкæсджытæн. Сæ нымæц та кæнæд фылдæр!

ГАССИТЫ Моисей

Печать E-mail