Байгом ног спортивон зал
Горæтгæрон районы Ирыхъæуы æртæуæла- дзыгон астæуккаг скъола байгом 2006 азы. У райдзаст. Кълæстæ, кабинеттæ, иннæ хатæн- тæ, хæрæндон, тыргътæ, асинтæ æрвылхатт дæр сты хæрзæфснайд. Ахуырæн дзы ис хорз уавæртæ.
Скъола куы сарæз той, уæд дзы спортивон зал нæ сырæзт, æмæ уыцы цухдзинад къуылымпы кодта физикон культурæ æмæ спорты рæзт. Ахуыргæнинæгтæн ацы дисциплинæ амыдтой æддейæ кæнæ та актон залы.
Куыд скъоладзауты ныййарджытæ, афтæ скъолайы разамынд, хъæубæсты цæрджытæ уый тыххæй хъаст кодтой алы рæттæм, æмæ сæххæст сæ бæллиц – ивгъуыд азы астæуккаг скъолайы фарсмæ арæзт æрцыд ног спортивон зал – 672 квадратон метры. Аразгæ та йæ скодтой паддзахадон программæ "Хъæууон территориты комплексон размæцыд"-мæ гæсгæ. Бахардз ыл кодтой 62,7 милуан сомы.
Ам хорз фадæттæ ис 235 ахуыргæнинагæн спорты алы хуызты архайынæн. Æхгæд залы ис спортивон инвентарь, уæлæдарæс ивæн хатæнтæ, хиæхсæнтæ, æндæр ифтонггæрзтæ. У дзы хъарм.
Спортивон зал официалон æгъдауæй байгом 11-æм мартъийы. Ардæм æрбацыдысты Цæгат Ирыстоны хъæууон хæдзарад æмæ хойраджы министр Къусраты Алан, Горæтгæрон районы администрацийы сæргълæууæг Есиаты Руслан, администрацийы Ахуырады управленийы разамонæг Кокайты Беллæ, æнæххæст бæрнондзинады æхсæнад "Строй климат"-ы генералон директор Бекъуырты Тимур, Ирыхъæуы бынæттон администрацийы сæргълæууæг Сиукъаты Иринæ, хъæуы Ныхасы сæрдар Хъæцмæзты Юри, хъæубæсты адæм, фæсивæд, скъоладзаутæ æмæ сæ ахуыргæнджытæ, журналисттæ. Ацагътой Уæрæсейы Гимн.
Спортивон бæрæгбоны раныхас кодтой Къусраты Алан æмæ Есиаты Руслан. Уыдон арфæ ракодтой скъолайы разамындæн, хъæубæстæн, спортзал саразджытæн, ахæм æнæнизгæнæн объект арæзт кæй æрцыд, уый тыххæй. Бафæндыд сæ, цæмæй дзы схъомыл уой Олимпаг хъæзтыты фидæны чемпионтæ.
Спортзалмæ бахизæны йæ гом кæныны церемонийы сырх лентæ алыг кодтой Къусраты Алан æмæ Ирыхъæуы асдæр адæймæгтæй иу, ССР Цæдисы чемпион хъæбысхæстæй Деметы Валико.
Ног спортивон залы æртæ чъири æмæ ирон бæгæныйæ арфæйы куывд ракодтой Хъæцмæзты Юри æмæ Деметы Валико. Уый фæстæ залы ацыдысты ерыстæ спорты цалдæр хуызæй.
ГАССИТЫ Моисей