Æртæ боны дæргъы
15, 16, 17-æм мартъийы уыдысты Уæрæсейы президенты æвзæрстытæ. Ацы бынатмæ кандидаттæ уыдысты цыппарæй – "Политикон парти "Ног адæм"-æй Владислав Даванков, йæхи раразмæгæнæг Владимир Путин, “Политикон парти "Уæрæсейы либералон-демократон парти"-йæ Леонид Слуцкий æмæ "Политикон парти "Уæрæсейы Федерацийы Коммунистон парти"-йæ та Николай Харитонов.
Уæрæсейы президенты æвзæрстытæ фыццаг хатт цыдысты æртæ боны дæргъы. Бæстæйы æдæппæт уыд 94 мин æвзарæн участокы, уыдонæй Цæгат Ирыстоны – 331, Горæтгæрон районы – 44.
Цæгат Ирыстоны æвзæрстытæм сæ хъус дардтой, сæрмагонд ахуырад чи райста, уыцы 1000 цæстдарæджы. Æвзæрстытæ ацыдысты бæрзонд æмвæзадыл, Центрон æвзарæн къамисмæ ницы хъæстытæ æрбацыд. Хъæлæс кæнынмæ чи æрбацыд, уыдоны процент дæр бæрзонд уыд – 90, иууыл фылдæр та – Алагиры районы: 94 проценты.
Уыцы бынаты ма Уæрæсейы президенты æвзæрстыты архайдтой бирæ адæм, се’хсæн бирæсывæллонджын бинонтæ, кæцытæ стырæй-чысылæй цыдысты иууылдæр иумæ, Украинæйы æфсæддон операцийы архайджытæ, фæсарæнты чи цæры, уыцы уæрæсейаг æмбæстæгтæ æмæ дзы командировкæты чи уыд, уыдон дæр.
Уæрæсейы Центрон æвзарæн къамисы рагагъоммæ бæрæггæнæнтæм гæсгæ президенты бынатмæ кандидаттæй æппæты фылдæр хъæлæстæ райста Владимир Путин – 87,32 проценты, уый фæстæ та Николай Харитонов – 4,32 проценты, æртыккаг бынаты ис Владислав Даванков – 3,79 проценты, цыппæрæм бынаты ис Леонид Слуцкий – 3,19 проценты.
Иу ныхасæй, ацы аз Уæрæсейы историкон цауы адæм сæхи равдыстой тынг активонæй.
ГАССИТЫ Моисей