Алы кæстæр дæр æнæмæнг хъуамæ зона, йæ хистæртæ хæсты быдыры цы хъæбатырдзинад æвдыстой. Цас æрыгæттæ ацыд тох кæнынмæ æвзонгæй æмæ сæ цард радтой нæ бæстæйы сæраппонд. Бирæты дзы схорзæхджын кодтой ордентæ æмæ майдантæй. Ирон адæммæ æппæты фылдæр ис Советон Цæдисы Хъайтартæ нымæцмæ гæсгæ æндæр адæмыхаттыты 'хсæн. Нæ кæстæртæн уый дæр зонинаг у.

Не скъолаты арæх ацæуы алыхуызон хъомыладон мадзæлттæ, викторинæтæ. Комгæроны хъæуы астæуккаг скъолайы дæр арæзт æрцæуынц. Бузныг стæм, махмæ, Ныхасы уæнгтæм дæр кæй фæдзурынц. Æрæджы та уыдтæн иу ахæм мадзалы. Бацæттæ йæ кодта скъолайы ахуыргæнæг Абайты Ларисæ. Сæйраг темæ уыд Фыдыбæстæйы Стыр хæсты не 'мзæххонты архайд, ома патриотизмы хъомылад.

Уыдис дзы Брейн-ринг. Архайдтой дзы æртæ командæйы. Сæ хæс уыд рæвдздæр раст дзуаппытæ раттын фарстатæн. Фембæлды командæтæ хуындысты "Бригантина" (капитан Гæбæраты Фатимæ), "Молния" (капитан Гæззаты Алинæ) æмæ "Чебурашка" (капитан Гæбæраты Измаил). Æртæ командæйы дæр хорз бацæттæ кодтой сæхи, уый бæрæг уыд сæ дзуаппытыл, æвдыстой сæ алыварсон арæхстдзинад. Фыццаг бынат бацахста "Молния", дыккаг – "Чебурашка", æртыккаг та – "Бригантина". Радтой сын грамотæтæ, алыхуызон лæвæрттæ.

БОЛАТАТЫ Тенгиз,

Комгæроны хъæу