Ивгъуыд азы уалдзæджы тæркъæвдаты фæстиуæгæн тынг раивылд Терчы дон, æмæ, Ногиры хид кæй хонынц, уый ныккалд. Аразгæ та йæ скодтой 52 азы размæ.

Ног хид амайын райдыдтой 2023 азы декабры, проектон документаци куы сцæттæ, уæд. Аразы йæ подрядон куыстуат "Южная строительная компания" (директор – Хуыгаты Хъазбег). Кусынц дзы дæсны специалисттæ: бетонгæнджытæ, æндадзджытæ, трактортыл æмæ уæзласæн автомашинæтыл кусджытæ. Пайда кæнынц нырыккон æрмæджытæй конд æфсæн-бетонон конструкцитæй. Уырдæм сæ ласынц Дзæуджыхъæуæй, хуыр æмæ змис та – Алагирæй.

Ног хиды фæтæн уыдзæн 17,6 метры, йæ дæргъ та – 136 метры. Хидмæ бацæуæн уыдзæн дыууæрдыгæй, йæ кæрæтты уыдзæн гæрæнтæ, судздзысты дзы рухсытæ, фистæгæй цæуджытæн дæр дзы уыдзæн фæндаг.

Аразджытæ уал нырмæ 18 метры зæххы бынмæ æфсæн-бетонон цæджындзтæ ныссагътой.

Ам æрвылбон хæрзхъæд куыст кæнынц сæйраг инженер Коцты Марат, Бигъаты Гермæн, Сабанты Сæрмæт, Гæззаты Леуан, Кокойты Эрик, Къусраты Алан, Бырнацты Таймураз, Гаглойты Хасан æмæ æндæртæ.

Ног хид кæронмæ арæзт фæуыдзæн ацы азы кæронмæ.

ГАССИТЫ Моисей

Печать E-mail