Горæтгæрон районы æвдæм хатт уагъд æрцыд фестиваль-конкурс "Цæгъд, фæндыр". Йæ сæрæвæрджытæ сты районы администрацийы Культурæйы управлени æмæ Октябрыхъæуы Культурæйы галуан. Алы аз дæр мадзал бацæттæ кæны нæ республикæйы культурæйы сгуыхт кусæг, фæндырдзæгъдæг, галуаны методист Кæркуысты Ларисæ.

Фестиваль-конкурс ацыд Культурæйы галуаны сценæйыл. Архайдтой дзы районы сывæллæтты музыкалон скъолаты, культурæйы хæдзæртты, аивæдты скъолаты æвзонг фæндырдзæгъдджытæ æмæ ансамбльтæ.

Конкурсы алы архайæг дæр акодта дыууæ цагъды. Конкурсанттæ дих уыдысты æртæ къордыл: кæстæртæ (9–11-аздзыдтæ), астæуккаг къорд (12–14-аздзыдтæ) æмæ хистæртæ (15–17-аздзыдтæ) – иууыл иумæ 50 архайæджы.

Жюрийы уæнгтæ уыдысты хъуыстгонд фæндырдзæгъдæг Евгени Воложанин, нæ республикæйы Культурæйы колледжы ахуыргæнæг Зæнджиаты Тамарæ, дунеон æмæ æппæтуæрæсеон конкурсты лауреат Мелыккаты Светланæ.

Конкурс амыдтой Культурæйы галуаны методисттæ Саутæты Дзерассæ æмæ Гæджиты Мурат.

Ацы мадзал æрвылаз дæр вæййы нæ хъуыстгонд фæндырдзæгъдджытæй искæй номыл. Ныр та кад кодтой Евгени Воложанинæн – фестивалы кадджын уазæг æмæ жюрийы сæрдарæн.

Уый райгуырд Казахстаны. Йæ фыд, Фыдыбæстæйы Стыр хæсты архайæг, уарзта аккордеоныл цæгъдын. Сахуыр кодта йæ фырты дæр. Уым, Казахстаны, Евгенийы сыхæгты фылдæр хай уыдысты кавказæгтæ – ирæттæ, цæцæйнæгтæ, хъæрæсейæгтæ. Уыдонæй хъуыста кавказаг музыкæ æмæ йæ бауарзта.

Астæуккаг ахуыр каст куы фæцис, уæд йæ музыкæйы ахуыргæнæг Гуыдиаты Тамарæйы фæндонмæ гæсгæ музыкалон ахуырад райсынмæ ссыд Ирыстонмæ 17-аздзыдæй æмæ ахуыр кæнын райдыдта Дзæуджыхъæуы аивæдты училищейы. Уый фæстæ йæ кусынмæ барвыстой Паддзахадон адæмон ансамбль "Алан"-мæ фæндырдзæгъдæгæй, æмæ гастрольты æрзылд дунейы бирæ бæстæты.

Йæ курдиатмæ йын цымыдис кодтой зындгонд музыканттæ Баллаты Валодя, Билаонты Долорес, Цæллагты Эмилия, Суанты Ким, Бæцæзаты Юри, Хъуылаты Елхъан, Медойты Светæ, Хадыхъаты Аллæ æмæ æндæртæ. Уыдон сæ зарджытæ райдыдтой Воложанины уацмыстæй. Иууыл тынгдæр та схæлар Суанты Кимимæ, æмæ йæ уый фæхуыдта Цæгат Ирыстоны паддзахадон национ оркестрмæ. Ныртæккæ ацы оркестр у Суанты Кимы номыл.

Евгени Воложанин куыста Паддзахадон филармонийы, Горæтгæрон районы культурæйы хайады, нæ адæмон ансамбль "Бæркад"-ы. Ис æм стыр музыкалон курдиат, ирон эстрадæ бирæ фæхъæздыгдæр кодта. Зарæггæнджытæн нæ поэтты æмдзæвгæтыл ныффыста музыкæ.

Уый йæ удау бауарзта Ирыстоны бæстæ, аргъ ын кæнынц нæ цæрджытæ дæр. Йæ цæрæнбонтæ сбаста Иримæ – ам баззад цæргæйæ. Рауагъта æмбырдгонд дæр æвзонг музыканттæн. Цæттæ у йæ иннæ чиныг дæр, ис дзы инструменталон уацмыстæ, мелодитæ, зарджытæ.

Воложанин у Цæгат Ирыстоны адæмон артист, хорзæхджын у майдан "Ирыстоны Намысæн"- æй, уымæн æмæ 55 азы дæргъы кæны ахадгæ сфæлдыстадон куыст.

Ацы конкурс-фестивалы сбæрæг сты хуыздæртæ: Куыдзеты Русланæ, Алинæ Кокова, Хъæбæлоты Санитæ, Кокойты Ангелинæ, Саукуйты Хъазыбег, Салхъазанты Кирæ, Мæхъиты Аланæ, Вероникæ Негрей, Тедеты Далилæ, Цхуырбаты Аделинæ, ансамбльтæ "Хуры тынтæ", "Хурзæрин", "Сфæлдыстад", Октябрыхъæуы сывæллæтты музыкалон скъола æмæ æндæртæ. Уæлахиздзаутæн радтой Кады грамотæтæ æмæ дипломтæ, сæ ахуыргæнджытæн та – Арфæйы гæххæттытæ. Сценæйыл фæндырæй ацагъта нæ республикæйы Культурæйы колледжы студент Томайты Алик.

ГАССИТЫ Моисей

Печать