Екатеринбурджы фæцис уæрæх фестиваль "Ирыстоны бонтæ Уралы". Уый уагъд цыд Цæгат Ирыстоны автономийы сырæзты 100 азы кадæн.

Национ культурæйы бæрæгбон ацыд бæрзонд æмвæзадыл, архайдтой дзы бирæ адæм, фылдæр – уым цæрæг ирæттæ. Программæйы уыд цымыдисон мадзæлттæ.

Ацы фестиваль сарæзтой зынгæ музыкант æмæ композитор Галаты Алыксандры фырт Барисы  (Аслан-Гирей) номыл Ирон культурæйы æхсæнады æмархайды культурон-патриотон центр Свердловы областы, Культурæйы министрад æмæ Екатеринбурджы администрацийы æмархайды фæрцы.

Фестивальмæ æрбацæуджытæн уыд фадат ирон национ зарджытæ æмæ кæфтытæм байхъусын æмæ фенын, рагон æгъдæуттæ базонын. Скуывтой ирон бæгæны æмæ æртæ чъирийæ. Иу дзырдæй, адæм федтой хъæздыг культурæ.

Фестиваль бацæттæгæнджытæ уыдысты Уралы цæрджытæ Дойаты Хъазбег, Аслан-Гирейы бынтыл аудæг Гаглойты Лианæ æмæ æндæртæ.

Ацы мадзал ма уыд культурон бастдзинæдтæ фидаргæнæг дæр, хорз фæд ныууагъта, чи йæм бацыд, уыдоны зæрдæты.

ГАССИТЫ Моисей

Печать