Æрæввахс кæны стыр ирон поэт æмæ прозаик, нывгæнæг, Ирыстоны кад æмæ намыс Хетæгкаты Къостайы райгуырды 165 азы юбилей. Уымæ сæхи разæнгардæй цæттæ кæнынц Ирыстоны дыууæ хайы, стæй уый æддейæ дæр.

Юбилей парахатæй цæмæй сбæрæг кæнæм, уый тыххæй нæ республикæйы арæзт æрцыд къамис, йæ сæргъы лæууы Хицауады сæрдары хæдивæг Платы Альбинæ.

Бæрæгбонон мадзæлттæ цæудзысты Къостайы райгуырæн хъæу Нары, Дзæуджыхъуы æмæ районты, Хуссар Ирыстоны, Мæскуыйы, Уæрæсе æмæ фæсарæнты ирон диаспорæтæ æмæ минæварадты. Йæ сæйрагдæр архайджытæ уыдзысты сфæлдыстадон æмæ зонадон кусджытæ, фысджытæ, актертæ, скъоладзаутæ. Цæттæгонд цæуынц мидисджын, биноныг программæтæ. Уыцы мадзæлттæ ацæудзысты нывыл уагæй, бæрзонд æмвæзадыл. Сæйрагдæр мадзæлттæ уыдзысты октябры мæйы. 9–15 октябры Мæскуыйы ацæудзысты Цæгат Ирыстоны культурæйы бонтæ, уым бирæ дзурдзысты Къостайы цард æмæ сфæлдыстадон фæндагыл. Цæттæгонд æрцыд егъау культурон программæ.

Дзæуджыхъæу æмæ районты кæй сæххæст кæндзысты, уыцы дзыллон мадзæлтты 'хсæн уыдзысты нывтæ æмæ къамты равдыстытæ, конкурстæ, спектакльтæ, литературон изæртæ æмæ зонадон-практикон конференци. Дидинджытæ сæвæрдзысты Дзæуджыхъæуы Ирон аргъуаны кæрты поэты ингæныл.

Хетæгкаты Къостайы юбилеймæ йæхи цæттæ кæны Горæтгæрон район дæр. Сæйрагдæр дзыллон мадзалттæ уагъд цæудзысты культурон артдзæстытæ æмæ скъолаты, цæрджытæ архайдзысты Нары хъæуы Хетæджы-фырты юбилейон бонты.

Нæ районы сæйрагдæр мадзал уыдзæн Октябрыхъæуы номдзыд фыссæг æмæ нывгæнæгæн бюст сæвæрын æмæ йæ байгом кæнын. Ацы хъæппæрис равдыста зынгæ меценат Лалыты Левæ. Куыд мын загъта, афтæмæй бюст ныридæгæн у цæттæ, дзырд цæуы, кæм æй сæвæрдæуа, ууыл.

Республикæ Хуссар Ирыстон дæр йæхи цæттæ кæны ирон литературон æвзаджы бындурæвæрæджы 165 азы юбилеймæ. Республикæйы ацæудзысты бирæ цымыдисон мадзæлттæ: спектакльтæ, равдыстытæ, викторинæтæ, конкурстæ, литературон изæртæ, концерттæ. Уыдон 15-æм октябрæй раздæр райдайдзысты.

Æппæт скъолаты дæр ацæудзæн конкурс "Удæгас урочы дæсны". Уыцы гом урокты ирон æвзаг æмæ литературæйы ахуыргæнджытæ дзурдзысты стыр поэты цард æмæ сфæлдыстадыл. Конкурсы хуыздæр æрмæджытæ бахаудзысты ахуырадон-методикон æмбырдгонд "Æххуыс ахуыргæнæгæн"-мæ. Акци "Къостайы сфæлдыстадон бынтæ: ирон адæмæн удæгас ратæдзæн"-ы дзырд цæудзæн стыр поэтыл.

Егъау уыдзæн, Хуссар Ирыстоны национ ахуырад æмæ æвзаджы политикæйы хайад кæй сараздзæн, уыцы мадзæл дæр – "Этнокъуым". Ацæудзæн ма конкурс Къостайы "Ирон фæндыр"-ы уацмысты мотивтæм гæсгæ ныв кæнынæй.

Кæронбæттæны уыдзæн уæрæхгонд зонадон-практикон конференци "Къоста – историк, этнограф, лингвист". Йæ куысты архайдзысты уазджытæ – Санкт-Петербург, Саратов, Мæскуы, Ростов, Цæгат æмæ Хуссар Ирыстоны этнографтæ, лингвисттæ, историктæ.

Къостайы 165 азы юбилейы кадæн Хуссар Ирыстоны мадзæлттæ дарддæр цæудзысты 2025 азы дæр.

Махæн Леуаны фырт Къоста у æнæмæлгæ, æмæ афтæ уыдзæн æнусты!

Гасситы Моисей

Печать