Президенты хæрзиуджытæ
Æппæтадæмон æхсæнадон змæлд "Иры Стыр Ныхас" æрæджы Украинæйы сæрмагонд æфсæдон операцийы архайджытимæ, спортсментимæ æмæ, астæуккаг скъола сыгъзæрин майдантыл каст чи фæцис, уыдонимæ фембæлд куы сарæзта, уæд уым базонгæ дæн ацы аз Парижы уагъд Олимпиаг хъæзтыты чемпион Коцойты Зелимимæ.
Cабыр, уæздан, æгъдауджын, хиуылхæцгæ ирон лæппу! Ацы фембæлды йын хæрзиуæг дæр радтой.
Спортуарзджытæ, æндæр адæм зонынц, Францийы Олимпиадæмæ Уæрæсейы спортсменты кæй нæ бауагътой. Цæй тыххæй, уый не 'ппæт дæр зонæм. Æмæ Коцойты Зелим та – не ‘мзæххон лæппу – уым Азербайджаны номæй архайдта. Дзюдойæ хæцыд 100 килограммы уæзы æмæ рамбылдта олимпиаг майдан.
Ацы бонты фехъуыстон ног æхсызгон хабар: Азербайджаны президент Ильхам Алиев Зелимы схорзæхджын кодта орден "Шохрат"-æй азербайджайнаг спорты размæцыдмæ сæрмагонд бавæрды тыххæй. Радта ма йын æхцайы преми дæр.
Арфæ кæнæм ирыстойнаг сæрæнгуырд Коцойты Зелимæн. Дарддæр дæр йæ къухты æфтæнт æнтыстдзинæдтæ!
ГАССИТЫ Моисей