Ахъайзаг фарстатыл дзургæйæ
Ивгъуыд цыппæрæмы районы культурæйы Галуаны уыд Горæтгæрон районы "Ныхасы" Советы æмбырд. Хуынд æм æрцыдысты хъæуты "Ныхас"-ты сæрдартæ, советы уæнгтæ. Уататы Зелим – Æппæтадæмон æхсæнадон змæлд ирæтты уæлдæр Совет "Стыр Ныхас"-ы сæрдар, Горæтгæрон районы сæргълæууæг Гаглойты Алан, сæрмагонд хæстон операцийы архайджытæ Тыбылаты Энвер, Гæззаты Виталий, "Стыр Ныхас"-ы комитеты сæрдар Томайты Шамил. Дзырдтой абоны боны ахъайзаг фарстатыл.
Æмбырд байгом кодта Горæтгæрон районы "Ныхас"-ы сæрдар Дзуццаты Валерий. Йæ доклады æрныхас кодта боны фæткмæ цы фарстатæ хæст æрцыдысты, уыдон цы уавæры сты æмæ сыл цы куыст цæуы (доклад мыхуыргонд æрцæудзæн газеты æввахсдæр номыртæй иуы). Рæзгæ фæлтæры 'хсæн нæ адæмы хорз æгъдæуттæ куыд фидаргонд цæуынц. Бæстонæй радзырдта ирон æвзаг цы уавæры ис, куыд æнæрвæссон æгъдауæй йæм кæсынц бирæ ирæттæ, уæлдайдæр та хистæртæй иуæй-иутæ. Æппæт уыдон æмæ æндæр æгъдæуттæ æмæ традициты уавæрыл, рæзгæ фæлтæры хъомыладон фарстаты фæдыл сæ хъуыдытæ загътой: Томайты Шамил, Уататы Зелим, Уæлыгæсты Тамарæ, Хуыгаты Æхсарбег, Болататы Тенгиз, Тыбылты Энвер, Дзуццаты Умар, Гæззаты Виталий, Михаил Ведров.
Æмбырды кæрон Дзуццаты Валерий æмæ Уататы Зелим схорзæхджын кодтой "Стыр Ныхасы" активон архайджыты арфæйы гæххæттытæй æмæ Ирыстоны, Уæрæсейы æмæ Таджикистаны сгуыхт адæмон артист Уататы Бибойæн йæ 80 азы номыл цы майдан уагъд æрцыд, уымæй.
Уыцы майданæй хорзæхджынгонд æрцыд Горæтгæрон районы сæргълæууæг Гаглойты Алан дæр. Кæронбæттæны хаст æмæ фидаргонд æрцыди æмбырды уынаффæ.
КОРТИАТЫ Æхсарбег