1918 азы 29 октябры ССР Цæдисы сырæзт фæскомцæдисон организаци. 1924 азы ссис Владимир Ленины номыл. Милуангай фæсивæд уыд йæ рæнхъыты, æвзонг фæлтæр бæллыдысты фæскомцæдисмæ бацæуын. Ныр йæ сырæзтыл сæххæст 106 азы.

Фæскомцæдисмæ йæ сырæзтæй фæстæмæ уыд идейон принциптæ, активондзинад æмæ бæрндзинад. Уыдон уыдысты фæсивæды ахсджиаг ориентиртæ – фæскомцæдисонтæ систы фидæны лидертæ, аккаг разамонджытæ, бæрзонд бынат ахсджытæ. Фæрæзтой зындзинæдтæн, арæзтой рæсугъд æхсæнад, фидæн. Абон дæр ма фæскомцæдисон стыр арæзтæдтæ цæстытыл ауайынц.

Махæй, хистæртæй, алчидæр хъуыды кæны, ацы организацийы рæнхъытæм куы бацыд уыцы бон æмæ нын баззад æхсызгон мысинагæй.

Фæскомцæдисы сырæзты 106 азы кадæн 29 октябры, нæ районы Октябрыхъæуы центры Ленинæн цы цыртдзæвæн ис, уый цурмæ æд дидинджытæ æмæ сырх тырысатæ æрбамбырд сты кæддæры фæскомцæдисонтæ – абоны коммунисттæ, фæсивæд, æндæр адæм. Фæскомцæдисы сырæзт æмæ æнæмæнгхъæуындзинады тыххæй митинджы раныхас кодтой Горæтгæрон районы коммунистты сæргълæууæг Биазырты Фатимæ æмæ районы Ныхасы сæрдар Дзуццаты Валери. Уый фæстæ коммунисттæ Танделаты Сослан, Болататы Феликс, Сланты Зæринæ, Зылыгты Геннади, Тотраты Игорь æмæ Сланты Константин хорзæхгонд æрцыдысты ССР Цæдсы сырæзты 100 азы æмæ космонавтикæйы 60 азы цытæн майдантæй.

Горæтгæрон районæй уæлдæр ахуыргæнæндæтты чи ахуыр кæны, уыцы студентты иу хай райстой фæскомцæдисы рæнхъытæм, билеттæ сын ратгæйæ.

ГАССИТЫ Моисей

Печать