Къостайы фарнæй – хайджын
Республикæ Цæгат Ирыстон – Аланийы Сæргълæууæг Сергей Меняйлойы Указмæ гæсгæ 2022–2023 азтæн Хетæгкаты Къостайы номыл Паддзахадон премийы лауреаттæ систы литературæ æмæ аивады зынгæ архайджытæ.
Уыдон нымæцы сты: Джыккайты Мурат – йæ нывтæ æмæ графикон уацмысты темæ "Ирон Нартиадæ"- йы тыххæй; Гуырдзыбегты Иринæ – йе 'мдзæвгæтæ, зарджытæ, очерктæ, лирикон уацмыстæ, поэмæтæ, тæлмацты тыххæй; Годжыцаты Изольдæ – хореографион спектакль "Нартæ"-йæн зæрдæмæдзæугæ этнографион костюмты коллекци кæй сцæттæ кодта, уый тыххæй; Коцты-Æгайты Кларæ – сабитæ, æнахъомтæн универсалон энциклопеди "Мæ Ирыстон" скæныны тыххæй; национ балет "Фатимæ"-йы авторты коллектив (Цæгат Ирыстоны Мариинаг театры филиал); Æлбегаты Георги – дирижер-æвæрæг; Суанты Валери – хореограф-æвæрæг; Найфонты Давид – костюмтæм гæсгæ сценограф æмæ нывгæнæгæн.
Арфæ сын кæнæм нæ бирæнымæцон сценæмæкæсджыты номæй. Ноджыдæр Хетæгкаты Къостайы фарнæй хайджын уæнт!
ПИСИТЫ Моисей