2025 азы февралы мæйы 100 азы æххæст кæны зынгæ ирон фыссæг æмæ ахуыргонд, филологон зонæдты доктор, профессор, академик, тæлмацгæнæг, поэт, драматург, прозаик, литературон критик, æхсæнадон архайæг, Хетæгкаты Къостайы номыл Паддзахадон литературон премийы дыууæ хатты лауреат Джусойты Гришæйы фырт Нафийы райгуырдыл. Уый фæзиан 2017 азы сæрды 92-аздзыдæй.

Хæрзаудæн фонд "Амонд" расидт конкурс Нафийы номыл национ литературон преми райсыны тыххæй 2024–2025 азтæн, ома йæ юбилейы цытæн. Ацы преми дæттын райдыдтой 2015 азæй, уæд ма Нафи сæрæгас уыд, сæххæст ыл 90 азы.

Премитæ сты æртæ. Ирон æмæ дыгурон диалекттыл чи фыссы, уыдонæн сæ дæтдзысты сæ мыхуыргонд аивадон уацмысты тыххæй. Преми райсынмæ кандидатты хъуамæ бавдисой сфæлдыстадон цæдистæ, зонадон-иртасæг уагдæттæ. Уыдон сæ фæндæттæ хъуамæ бахæссой премийы фондмæ ахæм хуызы: премимæ кæй æвдисынц, уыцы авторы цыбыр сфæлдыстадон биографи; фæстаг азты цы уацмыстæ рауагъта мыхуыры, уыдоны нæмттæ, стæй, кæд æрцыдысты мыхуыргонд, цахæм аргъ сын скодтой мыхуыры фæрæзты, уый бацамонын; премимæ æвдыст цæуынц романтæ, уацаутæ, радзырдты æмбырдгæндтæ, пьесæтæ, æмдзæвгæты чингуытæ; премимæ æвдисæг организаци йæ фыстæгимæ хъуамæ бавдиса, сфæлдыстадон цæдисы уынаффæ цы суагъæйы уа, уый халдих. Фыстæгимæ хъуамæ уа фыссæджы уацмысы мыхуыргонд оригинал; æвдыст цæуынц иу авторы уацмыстæ, коллективон – нæ; премимæ бавдисæг уацмысы автор цы бынаты цæры кæнæ кæцы бæстæйы æмбæстаг у, уымæн нысаниуæг нæй; премимæ бавдисæн ис удæгас фысджыты уацмыстæ.

Премтæ уыдзысты:

фыццаг – 200 мин сомы,

дыккаг – 150 мин сомы,

æртыккаг – 100 мин сомы.

 – Конкурсы чи фæуæлахиз уа, уымæн лæвæрд цæудзæн премиимæ иумæ лауреаты диплом æмæ, Джусойты Нафийы фæлгонц кæм ис, ахæм майдан. Уацмыстæн премимæ бавдисæн ис ацы азы ноябры мæйы кæронмæ ахæм адрисыл: г. Цхинвал, Исахъы уынджы 27- æм хæдзар, 2-аг уæладзыг, хæрзаудæн фонд "Амонд". Телефон: 8-929-805-30-94, – зæгъы мын "Амонд"-ы директор Челæхсаты Хъазбег.

Хæрзаудæн фонд "Амонд"-æн бындурæвæрæг у Самарæйы цæрæг, амалиуæггæнæг, ирон адæмы патриот Хуыгаты Ростислав. Уый та мын афтæ зæгъы:

 – Преми лæвæрд цæудзæн кадджын уавæры, æхсæнадон кусджытæ, дзыллон информаци, культурæ æмæ зонад, литературæ æмæ аивады зынгæ минæвæртты раз.

ПИСИТЫ Моисей

Печать