"Æз – ирон чызг"
Горæтгæрон районы Октябрыхъæуы Культурæйы галуаны сценæйыл ацыд нæ республикæйы районты 'хсæн национ конкурс-æркаст "Æз – ирон чызг". Бацæтæ йæ кодта æмæ йын сценари ныффыста ацы галуаны методист, Цæгат Ирыстоны культурæйы сгуыхт кусæг Коцты Аленæ.
Сылгоймаг царддæттæг у, æмæ йæ архайд, йæ фезмæлд, йæ куыст иууылдæр баст сты фарн æмæ амондимæ, фидæнимæ. Куыд хайджын сты абон нæ Иры чызджытæ уыцы фарнæй, куыд арæхсынц ирондзинадмæ, цавæр тырнындзинад сæм ис сæ удварны хæзнатæм, уый уыд ацы конкурс-æркасты сæйрагдæр нысан.
Конкурс-æркасты уыд цыппар фæлварæны, æмæ алы архайæг чызг дæр ирон дарæсы цыбыр рæстæгмæ рæсугъд, аив хъуамæ радзырдтаид, презентацийы хуызы равдыстаид, цæй тыххæй хоны йæхи ирон. Цавæр хъуыддæгтæ, æгъдау, миниуджытæ йын бар дæттынц афтæ зæгъынæн. Уый уыд фыццаг фæлварæны нысан.
Конкурсы архайдтой авд чызджы: Агънаты Дианæ – Горæтгæрон районы Джызæлы хъæуæй, Бететы Альбинæ – Кировы районы Елхоты хъæуæй, Уататы Кристинæ – Æрыдоны районæй, Джимиты Агуындæ – Рахизфарсы районы Фарны хъæуæй, Елойты Дианæ – Дыгуры районæй, Тогойты Виктория – Дзæуджыхъæуæй, Хæмыцаты Аринæ – Æрæфы районы Толдзгуыны хъæуæй.
Дыккаг фæлварæн хуынд "Къонайы æфсинтæ", æртыккаг – "Сфæлдыстадон", цыппæрæм та – "Мæ фыдæлты уæзæг – мæ райгуырæн зæхх".
Цæмæй æркастæн аккаг аргъгонд æрцыдаид, уый тыххæй дзы уыд жюри дæр, йæ сæргъы – Цæгат Ирыстоны адæмон сфæлдыстадон хæдзары директор Лалыты Хъазбег, стæй ацы сфæлдыстадон хæдзары адæмон сфæлдыстады хайады сæргълæууæг Битарты Ларисæ, Горæтгæрон районы администрацийы сæргълæууæджы хæдивæг Джиоты Янæ, Æппæтдунеон æхсæнадон змæлд "Иры Стыр Ныхас"-ы Сылгоймæгты комитеты сæрдар Махъоты Иринæ, Цæгат Ирыстоны фæсивæдон парламенты депутат Горæтгæрон районæй Гуыриаты Руслан.
Ерысдзау чызджытæ цыппар фæлварæны дæр сæхи сæрæнæй равдыстой. Фыццаг фæлварæны сæ алчидæр радзырдта йæ фыдæлты, мыггаджы, бинонты, йæхи царды хабæрттæ, сæрыстыр цæмæн у, ирон чызг кæй у, уый тыххæй.
Конкурсы дыккаг хайы та сæ алчидæр скодта уæливыхтæ. Йæ хъус сæм лæмбынæг дардта нæртон æфсин, Сунжæйы Культурæйы хæдзары директор Хъæцмæзты Маринæ.
Цымыдисаг уыд æртыккаг фæлварæн дæр – "Сфæлдыстадон". Чызджытæ сæхи фæлвæрдтой алыхуызон аивадон хуызты арæхстджынæй равдисыныл (аив кæсын, кафын æмæ зарын). Хонгæ кафт акодта Агънаты Дианæ Хъуылаты Сæрмæтимæ. Бететы Альбинæ азарыд "Æз – ирон чызг". Уататы Кристинæ бакаст "Фæстаг монолог", ссардта дзы Ирыстоны хъæбатыр чызг Баситы Чабæхæны рухс ном. Джимиты Агуындæ акафыд йæ дыууæ æфсымæримæ. Елойты Дианæ аив бакаст Галуанты Людæйы æмдзæвгæ "Ирон æвзаг". Хонгæ кафт акодта Тогойты Виктория дæр Давид Симоненкоимæ. Хæмыцаты Аринæ аив сæххæст кодта хореографион сæвæрд.
Къаддæр цымыдисдзинад нæ сæвзæрын кодта сценæмæкæсджытæм конкурсы кæронбæттæн хай – конкурс "Мæ фыдæлты уæзæг – мæ райгуырæн зæхх". Ерысдзау чызджытæ ацы фæлварæны адæмы базонгæ кодтой фыдæлтæй баззайгæ рæсугъд æмæ фæзминаг æгъдæуттимæ, рагон кусæнгæрзтæ æмæ хæдзарон мигæнæнтимæ. Уыцы æгъдæуттæ уыдысты: "Рыныбардуаг" (Галзилæнтæ) – Агънаты Дианæ, "Сусæгцыд" – Бететы Альбинæ, "Авдæнбæттæн" – Уататы Кристинæ, "Ирон кæлмæрзæн" – Джимиты Агуындæ", "Сафайы рæхыс" – Елойты Дианæ, "Хызист" – Тогойты Виктория, "Задæлески Нана" – Хæмыцаты Аринæ.
Уыдон пайда кодтой ирон мигæнæнтæй.
Номырты 'хсæн сæ арæхстдзинад æвдыстой Сунжæйы Культурæйы хæдзары адæмон кæфтыты ансамбль "Аивад" (Гæджиты Алан), гуымсæгыл цæгъдджыты ансамбль "Бæркад" (Хосроты Альберт), адæмон кæфтыты ансамбль "Бæркад", стæй Джихаты Рустам, Сохъуырты Ибрагим, Медойты Аслан, Хъуысаты Эльвирæ, инструменталон ансамбль "Фарн" (Коцты Аленæ).
Уый фæстæ сценæмæ схызтысты Лалыты Хъазбег, Горæтгæрон районы Ныхасы сæрдар Дзуццаты Валери, Культурæйы галуаны директор Мæхъиты Хадизæт, районы администрацийы Культурæйы управленийы хицау Табуты Георги, Махъоты Иринæ æмæ конкурсы архайджытæ. Уыдон бузныг загътой мадзал бацæттæгæнæг Коцты Аленæйæн, конкурсы архайджытæ æмæ сæ къухдариуæггæнджытæн сæ цымыдисон æркасты, ирон бафæзминаг æгъдæуттæ парахат кæныны тыххæй.
Жюри фыццаг бынат саккаг кодта Æрыдоны районы минæвар Уататы Кристинæйæн, дыккаг бынат бацахста Агънаты Дианæ (Горæтгæрон район), æртыккаг бынат та – Хæмыцаты Аринæ (Æрæфы район).
Уæлахиздзаутæн æмæ конкурс-æркасты æппæт архайджытæн, сæ бацæттæгæнджытæн радтой Кады грамотæтæ, Арфæйы гæххæттытæ, дипломтæ, премитæ, лæвæрттæ. Ахæм грамотæтæ ма сын радта районы Ныхасы сæрдар Дзуццаты Валери. Фыццаг бынат бацахсæг Уататы Кристинæйæн ма радтой конкурсы рон дæр.
ГАССИТЫ Моисей