Кæсæг-Балхъары ивгъуыд къуырийы кæрон конд æрцыд 15-æм æппæтадæмон конкурс-фестиваль "Черкесаг дуне". Архайдтой дзы бирæ сфæлдыстадон-аивадон коллективтæ.

Фестивалы уыдысты Горæтгæрон районы Октябрыхъæуы Культурæйы галуаны ансамбль "Бæркад"-ы гуымсæгæй цæгъдджытæ æмæ кафджыты къорд (ансамблы разамонæг – Уæрæсейы культурæйы сгуыхт кусæг Хосроты Елизаветæ).

Гуымсæгыл цæгъдджыты къухдариуæггæнæг у Хосроты Альберт, кафджытæн та – Томайты Андрей.

Нæ æрыгон фæсивæд фестивалы сæхи сæрæнæй равдыстой, сæ аивадæн сын кодтой зæрдиаг къухæмдзæгъд, дисы сæ æфтыдта.

Конкурсы жюри хорз аргъ скодта гуымсæгæй цæгъдджытæн æмæ кафджыты къордæн дæр – дыууæтæ дæр рамбылдтой "Гран-при". Лæвæрд сын æрцыд Кады гæххæттытæ æмæ майдантæ.

Уый æхсызгон хъуыддаг у, æмæ сын мах дæр арфæ кæнæм, дарддæр дæр сæ къухты æфтæнт радон уæлахизтæ. Сæ аивад, курдиат бæрзонддæр исæнт!

ГАССИТЫ Моисей

Печать E-mail