Горæтгæрон районы Октябрыхъæуы Культурæйы галуаны арцыд районы культурæйы кусджыты профцæдисон организацийы хыгъдон-æвзæрстыты конференци. Архайдтой дзы конференцийы делегаттæ, æндæр хуынд адæм.

Боны фæткы уыд ахæм фарстатæ: 2020–2025 азты районы культурæйы кусджыты профцæдисон организацийы сæрдары хыгъд; ревизион къамисы хыгъд; районы организацийы æвзæрст оргæнты æххæст бартæ æруромын; районы организацийы æвзæрст оргæнтæ сног кæнын; профцæдисон оргæнты æвзæрстыты æмгъуыдон бартæ сфидар кæнын; Горæтгæрон районы культурæйы кусджыты профцæдисон организацийы сæрдар сæвзарын, ацы организацийы уæнгтæ сæвзарын; Контролон-ревизион къамисы æвзæрстытæ; Культурæйы кусджыты æппæтуæрæсон профцæдисы Цæгат Ирыстоны республикон организацийы XXIV хыгъдон-æвзæрстыты конференцимæ делегаттæ сæвзарын æмæ афтæ дарддæр.

Æвзæрст æрцыдысты кусæг президиум æмæ секретариат.

Конференцийы архайдтой Цæгат Ирыстоны культурæйы кусджыты профцæдисон организацийы сæрдар Годжиты Еленæ, райадминистрацийы Культурæйы управленийы хицау Табуты Георги, барадон инспектор Тахъазты Людмилæ.

Боны фæткы фыццаг фарстайы фæдыл хыгъд радта районы культурæйы кусджыты профцæдисон организацийы сæрдар Мæхъиты Хадизæт, ревизион къамисы хыгъддæттæг уыд къамисы уæнг Саутæты Дзерассæ, Мандатон къамисы куысты тыххæй та хыгъд радта йæ сæрдар Гæджиты Мурат.

Делегаттæ сфидар кодтой Ревизион къамисы доклад.

Фарстаты фæдыл раныхас кодтой делегаттæ Татьянæ Клапкова, Годжиты Еленæ, Къалаты Мæдинæ æмæ æндæртæ.

Конференцийы сног кодтой организацийы æвзæрст оргæнтæ – сæрдар, совет æмæ Ревизион къамис.

Горæтгæрон районы культурæйы кусджыты профцæдисон организацийы сæрдарæй ногæй æвзæрст æрцыд Мæхъиты Хадизæт. Æвзæрст ма æрцыдысты культурæйы кусджыты республикон профцæдисон организацийы XXIV конференцимæ делегаттæ.

Хыгъдон рæстæг профцæдисон организацийы куыст нымад æрцыд рæстæмбисыл.

Районы культурæйы кусджыты профцæдисон организацийы раззагдæр кусджытæн конференцийы радтой Уæрæсейы æмæ Цæгат Ирыстоны культурæйы кусджыты профцæдисон организациты Кады грамотæтæ, премитæ.

Ууыл æмбырд йæ куыст фæцис.

ГАССИТЫ Моисей

Печать