Фыдыбæстæ хъахъхъæнæджы боны цытæн мадзæлттæ ацыд нæ районы. Адæм кад кодтой, хицæн рæстæджыты райгуырæн бæстæйæн ном чи скодта, уыдонæн, стæй, сæрæгас чи нал у, уыдонæн мысыдысты сæ рухс нæмттæ. Удæгас хъахъхъæнджытæ та бирæ фæцæрæнт, зындзинæдтæй, тыхст рæстæджытæй ссæрибар уæнт!

1992 азы фæззæджы дæр Цæгат Ирыстоны, фылдæр Горæтгæрон районы, уыд тыхæвзарæн бонтæ, æрцыд фыдбылыз. Сæ зæхх хъахъхъæнгæйæ, фæмард сты ирон лæппутæ. Уыдоны иу хай ныгæд сты æфсымæрон ингæны Камбилеевкæйы хъæуы райдианы, уæллаг фарс. Адæм бацæуынц æмæ сын рухсаг фæзæгъынц.

23 февраль Фыдыбæстæ хъахъхъæнæджы бон кæй у, уый нымайгæйæ ацы æфсымæрон ингæнмæ æрбацыдысты Камбилеевкæйы 1-æм рæвдауæндоны кусджытæ æмæ æрымысыдысты æдзард хæстонты рухс нæмттæ, Æнусон арты цур сæвæрдтой дидинджытæ.

– Ахæм акцитæ ахъазгæнæг сты истори зæрдыл дарынæн, кæстæрты патриотон хъомыладæн, не 'хсæн чи нал ис, уыцы хъæбатырты нæмттæ мысынæн, уымæн æмæ сты уæлахизхæсджытæ, – загътой сабидоны хъомылгæнджытæ.

ПИСИТЫ Моисей

Печать