Ацы бонты ирон адæм цытимæ мысынц зындгонд, хъуыстгонд фысджытæ, Ирыстоны ныфсы лæгтæ, æцæг патриоттæ, дзæнæттæгтæ Джусойты Нафи æмæ Джыккайты Шамилы рухс нæмттæ. Цас балæггад кодтой райгуырæн Ирæн, уый æргом бæрæг у, фысгæ, дзургæ дæр сыл бирæ фæкодтой. Æнгом хæлæрттæ уыдысты, кæд Шамил Нафийæ фынддæс азы кæстæр уыд, уæддæр. Иу уыд сæ цæхх æмæ къæбæр, иухуызон уыдысты адæмон сфæлдыстад, фольклор, ирон литературæйыл сæ хъуыдытæ дæр.

Бирæ сæм уыд иумæйагæй – сæ дыууæ дæр профессортæ, Къостайы премийы лауреаттæ, поэттæ, драматургтæ, зонадон кусджытæ, тæлмацгæнджытæ, публицисттæ, лектортæ, литературæиртасджытæ, æхсæнадон архайджытæ. Сæ дыууæ дæр хицæнæй фыстой ирон литературæйы истори. Аргъ сын кодта дзыллæ, кæстæрæй-хистæрмæ сæ бирæ уарзтой, кад сын кодтой, сæрыстыр сæ уыдысты. Афтæмæй баззадысты нæ зæрдæты.

Дыууæ фыссæджы юбилейтæ дæр уæрæхæй нысан кæнынц Ирыстоны дыууæ хайы æмæ уый æддейæ дæр.

Нафи Хуссар Ирыстоны Къуыдаргомы райгуырд, Шамил дæр уым, хохы фалейæ – Дзомагъгомы. Шамил цард æмæ ахуыр кодта Горæтгæрон районы Камбилеевкæйы хъæуы, Нафи та – Ногиры астæуккаг скъолайы. Уæдæ ма иумæйагæй цы вæййы!

Гъемæ хорз бакодта Цæгат Ирыстоны Хетæгкаты Къостайы номыл паддзахадон университеты разамынд, Нафи æмæ Шамилы рухс нæмттæ мысынæн иумæйаг зонадон конференци кæй скодта, уымæй. Уагъд цыд университеты ЮНЕСКОйы залы ивгъуыд къуыри, 27 февралы, Нафийы гуырæн боны (25 февралы та райгуырд Шамил).

Ардæм æрбацыдысты фысджытæ, ахуыргæндтæ, ахуыргæнджытæ, сфæлдыстадон æмæ зонадон интеллигенцийы минæвæрттæ, Цæгат Кавказæй уазджытæ.

Мадзал амыдта Цæгат Ирыстоны адæмон артист, республикæйы аивæдты сгуыхт архайæг Цæриаты Валери.

Куыд бæрæг у, афтæмæй, Нафи 50 азæй фылдæр кæм фæкуыста – Хуссар Ирыстоны Уанеты Захары номыл зонад-иртасæн институты, – уым дæр уыцы бон уагъд цыд стыр зонадон конференци Нафийы райгуырды 100 азы цытæн. Видеохиды фæрцы дыууæ конференциимæ дæр зонгæ кодтой куыд Хуссары, афтæ Цæгаты мадзæлтты архайджытæ дæр.

Номарæн конференцийы æппæт архайджытæн арфæ ракодтой Цæгат Ирыстоны паддзахадон университеты ректор Огъуаты Алан æмæ историон зонæдты доктор, профессор, Уæрæсейы Федерацийы зонæдты сгуыхт архайæг Цыбырты Людвиг. Уый фæстæ райдыдта конференцийы зонадон хай.

Хицæн фæрстыты фæдыл раныхас кодтой Цæгат Ирыстоны паддзахадон университеты ирон литературæйы кафедрæйы сæргълæууæг Хетæгкаты Кристинæ ("Джусойты Нафийы литературон æмæ зонадон хъысмæт"), Цæгат Ирыстоны Абайты Васойы номыл гуманитарон æмæ социалон иртасæнты институ ты хистæр зонадон кусæг Хъуысаты Зæлинæ ("Джусойты Нафи: цард æмæ дзырд"), университеты ирон литературæйы кафедрæйы доцент Асаты Наталья ("Мамсыраты Темырболаты фæлгонц Джусойты Нафийы сфæлдыстады"), Абайты Васойы номыл гуманитарон æмæ социалон иртасæнты институты хистæр зонадон кусæг Мамиаты Изетæ ("Шамил – дзырды тых æмæ дзырд йæ тыхы"), Уæрæсейы Фысджыты цæдисы уæнг Баситы Зæлинæ ("Джыккайты Шамилы æмдзæвгæты æмбырдгонд уырыссаг æвзагыл "Честь"-ы тыххæй), Гуманитарон æмæ социалон иртасæнты институты хистæр зонадон кусæг Дзапарты Елизаветæ ("Ироны дзырдæн тæлмацгондæй куыд аргъгонд цæуы"), газет "Северная Осетия"-йы сæйраг редактор Битарты Маринæ ("Дæ педагог æмæ зонадон къухдариуæггæнæг адæмон поэт Джыккайты Шамил куы уа").

Журналтæ "Мах дуг" æмæ "Ногдзау"-ы ног номыртæ дæр сты Джусойты Нафи æмæ Джыккайты Шамилы юбилейты фæдыл. Уый тыххæй сын ацы конференцийы уыд презентацитæ. Раныхас кодтой сæ сæйраг редактортæ Хетæгкаты Оксанæ æмæ Сæлбиты Дианæ. Раныхас ма кодта КæсæгБалхъары адæмон поэт, журнал "Минги Гау"-ы сæйраг редактор Аскер Додуев.

Мадзалы университеты аивæдты факультеты студенттæ равдыстой скъуыддзаг Нафийы драмæ "Азау æмæ Таймураз"-æй, бакастысты Шамилы пьесæ "Хъодыгонд зæд"-æй Борæханы монолог, стæй Джыккайыфырты æмдзæвгæ "Дыууадæс дзырды".

Баситы Зæлинæйы æмдзæвгæ "Нафи æмæ Шамил" аив бакаст Цæриаты Валери.

Зонадон-номарæн конференци бацæттæгæнджытæн æмæ архайджытæн мыггæгты номæй бузныг загътой æмæ арфæ ракодтой Джыккайты Мурат æмæ Джусойты Гурам.

Хæрзгæнæджы коммæ кæсын хъæуы. Нафи æмæ нын Шамил ныффæдзæхстой: уарзут Ирыстон, аргъ кæнут фыдæлты бафæзминаг æгъдæуттæн, ма уæ ферох уæд уæ фидæн.

Гъемæ уыдоны фæндиаг уæнт нæ абон æмæ нæ кæстæрты фидæн дæр!

ГАССИТЫ Моисей

 

Печать