Республикæ Хуссар Ирыстоны минæварад Мæскуыйы аст азы размæ сарæзта æрвылазон æхсæнадæмон литературон преми "Булæмæргъ". Ацы бонты йæ радтой "Мадæлон æвзаг – иудзинады бындур"-ы церемонийы фæлгæты, ивгъуыд аз Уæрæсейы Ахуыргæнæджы азыл нымад кæй æрцыд, уый хынцгæйæ.

Мадзал уагъд цыд Мæскуыйы Фæсарæйнаг хъуыддæгты министрады культурон центры. Ахуырадон æмæ рухстауæн куысты æнтыстдзинæдты тыххæй ахуыргæнджытæ райстой хæрзиуджытæ.

Культурон центрмæ мадзалмæ æрбацыдысты Уæрæсейы Президенты æхсæнадон проектты фæдыл управленийы хицау Сергей Новиков, Уæрæсейы Хуссар Ирыстоны минæварады сæргълæууæг Гасситы Знауыр, Паддзахадон думæ æмæ Фæсарæйнаг хъуыддæгты министрады минæвæрттæ, Уæрæсейы Президенты цур Республикæ Хъырымы æдзухон минæвар Георги Мурадов, Хуссар Ирыстоны Президенты Администрацийы сæргълæууæджы хæдивæг Джиоты Константин, Мæскуыйы уæвæг дипломатон мисситы сæргълæуджытæ Алхас Квициния (Абхаз), Альба Торрес (Никарагуа), Хесус Веласкес (Венесуэлæ), Харби Саид Мусса (Джибути) æмæ æндæртæ.

Хуссар Ирыстоны Президенты арфæйы фыстæг бакаст республикæйы ахуырад æмæ зонады министр Лолаты Аслан. Цæгат Ирыстон – Аланийы Сæргълæууæг Сергей Меняйлойы арфæйы ныхасимæ та мадзалы архайджыты базонгæ кодта Уæрæсейы Президенты цур Цæгат Ирыстоны æххæстбарджын минæвары хæстæ рæстæгмæ æххæстгæнæг Дзасохты Тамерлан. Бакастысты ма Мæскуыйы сахайраг думæйы сæрдар Алексей Шапошников æмæ Бетъырбухы губернатор Александр Бегловы арфæтæ дæр.

Уый фæстæ райдыдта премитæ дæттыны церемони. Ахуырадон архайд, ахадгæ рухстауæн куыст кæй кæнынц, уый тыххæй æхсæнадæмон литературон форум "Булæмæргъ"-ы кадджын дипломæй хорзæхгонд æрцыдысты Хуссар Ирыстоны Колыты Аксойы номыл аивæдты паддзахадон лицейы уырыссаг æвзаг æмæ литературæйы ахуыргæнæг Мадинæ Солдатова, Цхинвалы 3-æм астæуккаг скъолайы уырыссаг æвзаг æмæ литетаруæйы ахуыргæнæг Плиты Михал, Беслæны 4-æм астæуккаг скъолайы ирон æвзаг æмæ литературæйы ахуыргæнæг Дыгъуызты Индирæ, Елхоты 1-æм астæуккаг скъолайы ирон æвзаг æмæ литературæйы ахуыргæнæг Хъуылымбегты Зæлинæ.

Мæскуыйы Хуссар Ирыстоны минæварады Кадджын грамотæ райста Мæскуыйы культурæйы департаменты Æхсæнадон советы сæрдар Сергей Ладочкин, хуыздæр ахуыргæнджытæ – педагогты æрвылазон церемони "Мадæлон æвзаг – иудзинады бындур"-ы организацийы тыххæй.

Хуссарирыстойнаг дипломатон миссийы активон архайды тыххæй минæварады Кады грамотæйæ хорзæхджын æрцыд Уæрæсейы Федерацийы Хуссар Ирыстоны базарадон минæвар Таймураз Гогинов.

Форумы уазджытæ æмæ архайджытæ федтой Хуссар Ирыстоны сгуыхт нывгæнæг, уæрæсейаг æмæ æхсæнадæмон нывты равдыстыты номинант Гобозты Владимиры скульптурон композицитæ.

Уый фæстæ Уæрæсейы æмæ Хуссар Ирыстоны аивæдты дæснытæ равдыстой концерт.

ГАССИТЫ Моисей

Печать E-mail