Адæмы зæрдæтæ барухс кодтой
Абон Уæрæсейы бæрæг кæнынц Культурæйы кусæджы бон. Уый цытæн стыр мадзал ацыд Сунжæйы хъæуы Культурæйы хæдзары. Ардæм æрбацыдысты Цæгат Ирыстоны адæмон сфæлдыстады центры директор Лалыты Хъазбег, Культурæйы колледжы директор Æлбегаты Ларисæ, нæ районы администрацийы Культурæйы управленийы хицау Табуты Георги, Культурæйы колледжы ахуыргæнджытæ, хъæуы скъолаты æмæ сабидæтты ахуыргæнинæгтæ, хъомылгæнинæгтæ, районы цæрджыты социалон ифтонгады комплексон центры кусджытæ æмæ пенсиисджытæ, æндæр адæм
Цы мадзал бацæттæ кодтой Культурæйы хæдзары кусджытæ, уый схуыдтой "Бæрæгбонон концерт". Ам сæ арæхстдзинад æвдыстой культурон артдзæсты кафджытæ, зарæггæнджытæ, театры архайджытæ, хъæуы музыкалон скъолайы ахуыргæнинæгтæ. Сæ сæххæстгонд номыртæ уыдысты аив, зæрдæмæдзæугæ, сценæмæкæсджытæ сын кодтой зæрдиаг къухæмдзæгъд. Раст зæгъгæйæ, цæттæ дæр сæхи рагæй кодтой ацы равдыстмæ æмæ адæмы хорзæх райстой.
Концерт бацæттæгæнджытæн, стæй сценæмæкæсджытæн бæрæгбоны нысаниуæджы тыххæй арфæйы ныхæстæ загътой Лалыты Хъазбег, Æлбегаты Ларисæ æмæ Табуты Георги. Бафæндыд сæ, цæмæй ахæм изæртæ аразой арæхдæр.
Культурæйы хæдзары директор Хъæцмæзты Маринæ мын афтæ зæгъы:
– Концерт тынг фæцыд адæмы зæрдæмæ, уымæн æмæ дзы бирæ архайджытæ уыд, сæххæстгонд номыртæ уыдысты алыхуызæттæ.
Иумæ йæ цæттæ кодтам нæ кусджытимæ, фæлæ уæлдай фылдæр хъæппæрис равдыстой кафтыты ансамбль "Аивад"-ы разамонæг Гæджиты Алан, æппæт къордты аивадон разамонæг Плиты Викæ, зарæггæнджыты разамонæг Джихаты Рустам æмæ театры къухдариуæггæнæг Габуты Зинæ. Фылдæр уыдоны фæрцы сцæттæ, бирæ рæстæг чи ахаста, уыцы концерт.
Сунжæйы Культурæйы хæдзар барухс кодта адæмы зæрдæтæ, æмæ йын дарддæр дæр уæд æнтыстытæ размæ цæуыны нысанимæ! Бæрæгбоны хорзæх сæ уæд!
ПИСИТЫ М