Цытджын Уæлахизы бæрæгбоны рæстæг Джызæлы уæллаг фарс Советон Цæдисы Хъæбатыр Дойаты Давиды номарæн бынаты раз бирæ адæм æрæмбырд – хъæуы цæрджытæ, Дойаты мыггаджы минæвæрттæ, бынæттон администрацийы кусджытæ, Джызæлы Дойаты Давиды номыл дыккæгæм астæуккаг скъолайы ахуырдзаутæ.

Бæрæгбоны иннæ мадзæлтты æмрæнхъ хъæбатыры номарæн бынаты райхъуыст йæ номыл зарæг дæр. Акодта йæ бынæттон æрыгон лæппуты къорд.

Диссаг мæм куыд нæ фæкаст: ацы æвзонг фæсивæд афтæ ныфсджынæй сæ арæхстдзинад адæмы рæнхъмæ куыд рахастой, сæ фæзминаг хъæппæрисæн кæд æмæ кæм уыди йæ райдайæн? Хъыгагæн, абоны онг нæм нæ рагфыдæлтæй цы диссаджы адæмон зарджытæ æрхæццæ, уыдон, нырыккон музыкалон культурæ кæй хонынц, уый аууон цадæггай уæвын райдыдтой, стæм хатт сæ фехъусдзынæ чындзæхсæвты, телеуынынады æмæ радиойы музыкалон бакастыты.

Фæстæдæр фембæлдтæн æрыгон зарæггæнджыты къордимæ сæ радон репетицийы Джызæлы Культурæйы хæдзары. Хабæрттæ мын ракодта сæ разамонæг Танхълаты Валери. Уый йæхæдæг бирæ азты дæргъы разæнгардæй архайдта хъæубæсты сфæлдыстадон коллективты, æмæ фæсивæды бафæндыд, цæмæй сын фæхай кæна йæ фæлтæрддзинад æмæ зонындзинæдтæй, базонгæ сæ кæна ирон адæмон зарджыты сусæгдзинæдтимæ, бæлвырддæр сын базоной сæ мидис, равзæрды хабæрттæ, сæхæдæг дæр сæ бафæлварой зарын. Валери, кæй зæгъын æй хъæуы, æхсызгонæй сразы йе 'взонг хъæуккæгты фæндонимæ – æгайтма архайынц, тырнынц ирон аивады ахъаззагдæр æмæ ахадгæдæр къабæзтæй сæ иуы дарддæры рæзтмæ сæ аккаг хай бавæрынмæ.

Бирæ рæстæг нæма рацыд, æрыгон зарæггæнджыты къорд репетицитæ кæнын куы райдыдта, уæдæй нырмæ, фæлæ уал абон сæ репертуары ис Советон Цæдисы Хъæбатыр Дойаты Давиды, Джызæлы хæстонты, Рыны бардуаджы, Хосдзауты, Джызæлы, Бæлоны (сывæллæттæн) æмæ æндæр зарджытæ.

Къорды уæнгтæн сæ иу фембæлдæй иннæмæ аивдæр, рæсугъддæр æмæ зæрдæмæдзæугæдæр кæны се сфæлдыстадон æмгуыстад, сæ аивадон æрмдзæф. Архайынц дзы хъæуы скъолаты хистæр кълæсты ахуырдзаутæ, чидæртæ дзы абон ахуыр кæнынц Дзæуджыхъæуы уæлдæр скъолаты. Ранымайдзыстæм сæ: Хъодзаты Бола, Моргуаты Мурат, Дойаты Сæрмæт, Дриаты Хасан, Чсиаты Азæмæт æмæ Токаты æртæ æфсымæры – Азæмæт, Артур æмæ Аскар. Аскар у се 'ппæтæй æрыгондæр, цæуы фæндзæм къласмæ, фæлæ уый дæр бирæ уарзы ирон адæмон зарджытæ, æмæ йæ нæ бафæндыд йе 'фсымæртæй фæсте баззайын.

Танхълаты Валерийы хъуыдымæ гæсгæ, ирон адæмон зарæг хъомыс у егъау – æппæты фыццаг, зонгæ кæны кæстæрты нæ раздæры фæлтæрты хæстон æмæ фæллойадон сгуыхтдзинæдтимæ, зынгæ историон цаутимæ, уымæй уæлдай та ма сын сæ æрыгон зондахасты фидар кæны фыдæлты æгъдæуттæ æмæ традицитæ. Уыцы арфæйаг хæс сæ рæстæджы кадимæ æххæст кодтой Кæсæбиты Митя, Гулчеты Епо, Сæбанты Хаджумар, Хъуыссæты Хъылци æмæ нæ раздæры иннæ зындгонд зарæггæнджытæ. Æмæ сæ хъуамæ рох ма кæнæм, сæ аивадон традицитæ сын дарддæр хъуамæ хæццæ кæной кæстæр фæлтæры минæвæрттæ.

ХÆМЫЦАТЫ Морис