"Сау айнæджы рындзыл Нары хъæу хуыссы…" - фыста кæддæр нæ ирон Кад æмæ Намыс Хетæгкаты Леуаны фырт Къоста. Æмæ 15 октябры сау айнæджы рындзыл æмæ Поты фæзы дæр къух бакæнæн нæ уыд адæмæй. Уыдоны Нармæ схаста Къостамæ уарзондзинад. Уыцы бон Цæгатæй Хуссармæ æхсызгонæй мысыдысты йæ рухс ном.

Бæрæгбоны уыдысты нæ интеллигенцийы минæвæрттæ, ахуыргæндтæ, фысджытæ, артисттæ, культурæйы   къабазы кусджытæ, студенттæ, ахуыргæнджытæ, скъоладзаутæ, уазджытæ алы рæттæй, æхсæнадон организациты минæвæрттæ, æндæр адæм, уыцы нымæцы - Горæтгæрон районæй дæр.

Цæгат Ирыстон æмæ Хуссар Ирыстоны делегациты сæргъы лæууыдысты Цæгат Ирыстон-Аланийы Сæргълæууæг Битарты Вячеслав æмæ Республикæ Хуссар Ирыстон-Паддзахад Аланийы Президент Бибылты Анатоли. Дидинджытæ сæвæрдтой Къостайы цыртдзæвæныл, уый фæстæ федтой фыссæджы хæдзар-музейы экспозици.

Адæммæ цымыдисдзинад сæвзæрын кодтой, Ирыстоны районтæ сæ цатырты цы равдыстытæ сарæзтой, уыдон: национ къæбиц, адæмон æрмдæсныйады дзаумæттæ, армукъа. Ам сарæзтой мастер-класстæ бийын æмæ хуыйынæй, уæй кодтой алыхуызон хъæугæ чингуытæ, ирон къæлиндартæ, хæдзарон мигæнæнтæ.

Бæрæгбоны мадзал амыдта артист Лалыты Хъазыбег. Сценæйыл фыццаг азæлыд Хетæджы-фырты ныхæстыл фыст "Балцы зарæг" Мариинаг театры Цæгат Ирыстоны филиалы нæлгоймæгты хоры архайдæй (йæ разамонæг - Дзанайты Ольгæ).

Уый фæстæ сценæмæ схызтысты Битарты Вячеслав, Бибылты Анатоли æмæ Цæгат Ирыстоны фысджыты цæдисы сæрдар Агънаты Гæстæн. Дзырдтой номдзыд фыссæджы егъау æнтыстытыл, йæ адæммæ уарзондзинадыл, "Ирон фæндыр"-ы æнæкæрон ахадындзинадыл æмæ æрсидтысты ирон адæммæ, цæмæй кæрæдзи уарзгæйæ цæрой, Къоста нын куыд фæдзæхста, афтæ.

Поты фæзы сæрмагонд арæзт манежы Къостайы цард æмæ архайды мотивтæм гæсгæ уыд премьерон музыкалон-поэтикон спектакль "Бæрæгбон хæхты". Архайдтой дзы паддзахадон бæхты драмон театр "Нартæ", ирон театры актертæ, ЦИПУ-йы æмæ аивæдты колледжы студенттæ.

Стыр концертон программæ æххæстгæнджытæ дарддæр уыдысты Паддзахадон академион ансамбль “Алан, адæмон кæфтыты ансамбль "Ирыстон", Тæбæхсæуты Балойы номыл паддзахадон академион театры артисттæ, вокалон къорд "Хъуыбады", Гергиты Валерийы номыл аивæдты училище, кафты ансамбль "Сæрмæт", Гергиты Валерийы номыл аивæдты колледжы вокалон къорд, Мариинаг театры филиалы нæлгоймæгты хор, зарæггæнджытæ Бекъойты Вано, Дауыраты Эдуард, Хъæбæлоты Руслан, Гуыбиаты Эльбрус æмæ æндæртæ.

Горæтгæрон районы делегацийæн разамынд лæвæрдта райадминистрацийы сæргълæууæг Есиаты Руслан. Хъæздыг программæимæ сæ арæхстдзинад æвдыстой Культурæйы галуаны зарæггæнджытæ, фæндырдзæгъдджытæ, артисттæ. Нæ районæн ам цы равдыст уыд, уый федта нæ республикæйы Сæргълæууæг битарты Вячеслав дæр æмæ йын хорз аргъ скодта.

Районы иумæйагахуырадон скъолаты ахуыргæнджытæ æмæ скъоладзаутæ, "Ныхас"-ы уæнгтæ, культурæйы къабазы кусджытæ æмæ æндæр кусæндæтты фæллойгæнджытæ суанг изæрдалынгтæм æвдисæн уыдысты юбилейон мадзалæн.

Дæ ном, дæ кад цæрæд, нæхи Къоста!

ГАССИТЫ Моисей.