Æппæт уавæртæ дæр сын ис
Ацы аз сæрды Тарскæйы хъæуы цытджын æгъдауæй байгом ногарæзт амбулатори. Бон, дам, цæуы æмæ фарн йемæ хæссы! Тарскæйæгтæ райгонд сты, ахæм капиталон арæзт хосгæнæндон сæм кæй сырæзт, уымæй.
Амбулаторийы сæйраг дохтыр Хæмыцаты Ритæмæ ис куысты фæлтæрддзинад. Цæгат Ирыстоны медицинон институт каст фæуыны фæстæ кусынмæ æрбацыд Тарскæмæ æмæ ныр 38 азы дæргъы фæллой кæны ам, уыдонæй 22 азы у амбулаторийы сæйраг дохтыр. Йæ къухы фондз æнгуылдзау зоны хъæуы алкæцы хæдзары бинонты дæр. Хъæубæстæ аргъ кæнынц йæ куыстæн, сты дзы райгонд. Рынчынтимæ йын ис уæздан ахастдзинад. Уый федтам нæхи цæстæй, ацы хъæуы кусæг балцы куы уыдыстæм, уæд.
Хорзы кой дардмæ хъуысы. Æмæ 2019 азы Ритæйæн лæвæрд æрцыд Цæгат Ирыстоны сгуыхт дохтыры кадджын ном. Фæлæ йæ хуыздæр хæрзиуæг хоны, кæмæн лæггад кæны, уыцы адæмы хорзæх.
- Æнæмæнг, æхсызгон у, ног амбулатори нæм кæй фæзынд, уый. Бузныг нæ республикæйы æмæ районы разамындæн, ахæм хæрзиуæг нын кæй балæвар кодтой, уый тыххæй.
Амбулаторийы зæронд агъуысты нæ куыст зæрдæйы фæндиаг нæ цыд, къуындæг уавæртæ нын кæй уыд, уымæ гæсгæ. Бæстыхай кæлæддзаг уавæры уыд. Ныр нæ авналæнтæ фæуæрæхдæр сты, кусынæн, рынчынтæн лæггад кæнынæн нын ис æппæт уавæртæ, - зæгъы Ритæ.
Ногарæзт амбулаторийы æппæт хатæнтæ дæр сты райдзаст, хъарм, ис сæ хосгæнæн хъæугæ ифтонггæрзтæ. Æфснайд, рæсугъд у амбулаторийы кæрт æмæ алыварс дæр.
Уæдæ амбулаторийы кусджытæй дæр нæй рахъастгæнæн. Уый тыххæй нын дзырдтой, уыцы бон амбулаторимæ дохтыры æххуыс бацагурынмæ чи æрбацыд, стæй йæ сывæллæтты чи æрбакодта, уыцы ныййарджытæ дæр. Калоты Азæ æмæ нын Багаты Ингæ загътой, ардæм куы æрбацæуынц, уæд сын æппæт медперсонал дæр цæстуарзон лæггад кæй бакæнынц.
Хæмыцаты Ритæ у дохтыр-педиатр. Æрвылбон дæр æм цæуынц рынчын сабитæ. Бакæны сын æмбæлгæ медицинон æххуыс.
Цхуырбаты Луизæмæ дæр ис уæлдæр медицинон ахуырад, ам дохтыр-терапевтæй кусы 2006 азæй нырмæ æмæ йæ зонындзинæдтæ, йæ хъару не 'вгъау кæны рынчынтæн.
Ис ма дзы боныгон стационар дæр 3 сынтæгимæ, кусы 2 сменæйæ. Ис дзы физиопроцедурон кабинет дæр (медицинон хо - Битеты Маринæ), æвгъæдгæсы (акушеркæ) кабинет (Зæгъойты Мая). Педиатр дзы у Багаты Оксанæ, фелсыр - Бибылты Мæдинæ, боныгон стационары медицинон хойæ кусы Багаты Маринæ, регистратурæйы - Æлборты Фатимæ. Медицинон хо Ингæ Тигишвили дæр рагæй кæны ацы куыст, у фæлтæрд хосгæнæг.
Амбулаторийы хатæнтæ, бацæуæнтæ, тыргътæ хæрзæфснайд кæй сты, уый у Тыбылты Зæирæйы къухты фæллой. Иудадзыг дæр лæууы йæ куысты уæлхъус, къуымты рыг абадын нæ уадзы.
Амбулаторийы ис 10 кабинеты, алы бон дæр ардæм æрбацæуы 50 адæймаджы бæрц се 'нæниздзинад басгарын æмæ сæхи сдзæбæх кæнынмæ. Райгондæй аздæхынц сæ къонатæм, сæ удты дохтырты хорз аудындзинадæй ныфс бацæуы!
Æнæниз ут, тарскæйæгтæ!
ГАССИТЫ Моисей.
Къамтæ систа ПЛИТЫ Каринæ.