Уæрæсейы архайы нысанмæздæхт Федералон программæ "Уæрæсейы Федерацийы физикон культурæ æмæ спорты размæцыд"-ы Федералон проект "Спорт - царды нормæ". Уый фæлгæты ацы аз Камбилеевкæйы хъæуы сæйраг - Кучийы-фырты номыл уынджы 2-æм астæуккаг скъолайы цур аразын райдыдтой ног бирæфункционалон гом хъазæн фæз сывæллæтты спортивон-æнæнизгæнæн комплексимæ. Йæ аразæг - "ИП Тигиев". Ацы фæзуат кæронмæ арæзт фæцис æмæ байгом знон, 25 декабры.

Кадджын мадзалмæ æрбацыдысты районы администрацийы сæргълæууæг Есиаты Руслан, районы сæргълæууæджы хæдивæг Багаты Марат, республикæйы Спорты министрады физикон культурæ æмæ дзыллон спорты размæцыды хайады хицау Гæззаты Георгий, йæ хæдивæг Тамерлан Алиев, районы администрацийы фæсивæды хъуыддæгты, физикон культурæ æмæ спорты фæдыл хайады хицау Годжыцаты Артур, Камбилеевкæйы хъæуы бынæттон администрацийы сæргълæууæг Табуты Тамарæ, фæсивæд, скъоладзаутæ, хъæубæсты адæм...

Мадзал амыдтой хъæуы 1-æм астæуккаг скъолайы ахуырдзаутæ Дзасохты Ацæмæз æмæ Дзиццойты Миленæ. Уæрæсейы æмæ Цæгат Ирыстоны Гимнтæ ацæгъдыны фæстæ райдыдта мадзал.

Æрцæуæг адæмæн ногазон арфæтæ ракодтой Есиаты Руслан, Гæззаты Георгий, Камбилеевкæйы "Ныхас"-ы сæрдар Уалыты Мæирбег. Бахастой фæндон, цæмæй спорты фылдæр фæсивæд архайа æмæ фылдæр кæной Олимпаг, Европæйаг, Уæрæсейы чемпионты рæнхъытæ. Уый фадат сын ныр ис. Бузныг загътой, ацы спортивон хъазæн фæзуат саразынæн зæхх чи балæвар кодта, уыцы амалхъом Хъæцмæзты Роландæн (фæзуат ахсы 800 м2).

Ахæм хъазæн фæзтæ ма нæ районы фæзынд Архонкæ æмæ Тарскæйы.

Спортивон-æнæнизгæнæн комплексмæ бацæуæны сырх лент алыг кодтой Есиаты Руслан, Табуты Тамарæ æмæ кæстæр ахуыргæнинаг.

Районы администрацийы номæй Годжыцаты Артур спортивон фæзæн балæвар кодта хъазæн портитæ.

Митын Дада æмæ Митын чызг та ногазон лæвæрттæ байуæрстой скъоладзаутæн.

ГАССИТЫ Моисей.