Ирон национ культурæйыл æрцыд уæззау зиан – йæ царды 88-æм азы ахицæн нæ интеллигенцийы хуыздæр минæвæрттæй иу, Ирыстоны кад æмæ намыс Гæздæнты Гаппойы фырт Булат.

Нал ис нæхи хъуытазхъæлæс Булат, ирон адæмы булæмæргъ, нæ кад нын уæлæрвтæм чи иста, уыцы номдзыд адæймаг.

Булат райгуырд 1936 азы. Йæ чысылæй фæстæмæ бауарзта музыкæ æмæ дзы йæ мæлæты бонмæ нæ фæхицæн.

Астæуккаг скъола каст фæуыны фæстæ ахуырмæ бацыд Дзæуджыхъæуы музыкалон училищемæ, æмæ йæ ахуыр куы ахицæн кодта, уæд ацыд Мæскуымæ Гнесинты номыл музыкалон-педагогон институтмæ. Æмæ йæ каст фæцис æнтыстджынæй.

Гæздæнты Булаты музыкалон курдиат ирдæй фæбæрæг 1968 азы Софияйы фæсивæд æмæ студентты IX Дунеон фестивалы концертон программæйы – райста дзы сызгъæрин майдан.

Йæ концертон программæимæ уыд бирæ бæстæты – Англи, Шотланди, Кубæйы сакъадахы, Швеци, Исланди, Норвеги, Герман, Турк, Сири, Чехи æмæ бирæ æндæр бæстæты. Ис афтæ зæгъæн, æмæ зæххы къорийыл æрзылд ирон музыкæйы программæимæ. Йæ фæндыры цагъд кæм нæ айхъуыст! Фылдæр æххæст кодта рагон фольклорон ирон цæгъдтытæ, æмæ семæ базонгæ сты бирæ адæмыхаттыты минæвæрттæ.

Гæздæнты кадджын лæг адæмон-музыкалон фольклор æмбырд æмæ ахуыр кодта къорд азты – у 50 зарæджы автор.

Стыр музыкант, Цæгат Ирыстоны адæмон инструментты оркестры аивадон разамонæг æмæ дирижер Гæздæнты Булат уыд Ирыстоны адæмон артист (1968), Уæрæсейы Федерацийы адæмон артист (2008), Хуссар Ирыстоны аивæдты сгуыхт архайæг (1998), Хетæгкаты Къостайы номыл Паддзахадон премийы лауреат.

Уый схъомыл кодта ирон музыкæмæ тырнджыты æнæхъæн фæлтæр. Йæ номыл фыст æрцыд аивадон уацмыстæ.

Нæ рагон музыкæ хъахъхъæнæг æмæ парахатгæнæг, нæхи Булат æнгомæй цард нæ районы адæмимæ. Октябрыхъæуы Культурæйы галуаны цы районон конкурстæ уагъд фæцæуы "Цæгъд, фæндыр", уыдонæй дæр иу уыд Булаты номыл, ам ын уыд бирæ зонгæтæ.

Ныр йæ уæлион цардæй ахицæн, æмæ не 'хсæн цы фарн æмæ намыс ныууагъта, уыдон æнусты цæрдзысты йæ номимæ.

Рухсаг у.

ГАССИТЫ Моисей