Хорз хъуыддæгтæ аразы Æппæтадæмон æхсæнадон змæлд "Иры Стыр Ныхас".

Ивгъуыд къуырийы та Дзæуджыхъæуы сарæзта фембæлд Уæрæсейы сæрмагонд æфсæддон операцийы архайджытимæ – Хъæбатыры нæмттæ дзы чи райста, нæ уыцы æмзæххонтимæ, стæй спортсментимæ, астæуккаг скъола сызгъæрин майданыл каст чи фæцис, уыдонимæ.

Мадзал конд æрцыд Иры Стыр Ныхасы бæстыхайы. Уыдысты дзы Ныхасы уæнгтæ, интеллигенцийы минæвæрттæ, сфæлдыстадон кусджытæ, Сылгоймæгты комитетты уæнгтæ, фæсивæд, уыдоны нымæцы нæ районæй дæр.

Фембæлд амыдта актер Цæриаты Валери.

Видеороликты фæрцы фембæлды архайджытæ базонгæ сты æфсæддон операцийы Хъæбатыртæ Есенаты Таймураз, Датиты Алан, Абайты Юрийы цардвæндаг æмæ хæстон сгуыхтдзинæдтимæ.

Мадзалы ма раныхас кодта Францийы ацы бонты уагъдцæуæг Олимпиаг хъæзтыты чемпион Коцойты Зелим.

Цæгат Ирыстоны астæуккаг скъолаты рауагъдонтæй сызгъæрин майдантæ чи райста, астæуккаг ахуыр æнтыстджынæй чи фæцис, уыдонæй Иры Стыр Ныхасы разамынд фембæлдмæ фæхуыдта Туаты Индирæ, Тегаты Даринæ, Цомайты Марат, Плиты Хетæг, Дойаты Сæрмæт, Дзанайты Тимур, Гагкайты Георги, Къутæрты Сæрмæт æмæ Персаты Георгийы.

Уыдонæй Дзанайты Тимур у Горæтгæрон районæй. Мадзалы аныхас кодтон йемæ.

– Ацы аз иттæг хорз нысæнттыл каст фæдæн Михайловскы хъæуы асæуккаг скъола, райстон сыгъзæрин майдан сырх аттестатимæ. Уæлдæр ахуырмæ бацыдтæн Цæгат Ирыстоны паддзахадон университетмæ, равзæрстон математикæйы факультет. Мæ дæсныйадыл кæддæриддæр уыдзынæн æнувыд, лæггад кæндзынæн Фыдыбæстæйæн, – зæгъы мын Тимур.

Фембæлды раныхас кодтой Иры Стыр Ныхасы Координацион советы сæрдар Уататы Зелим, Цæгат Ирыстоны пысылмæтты муфти Гуæцæлты Хадзымурат, журнал "Мах дуг"-ы редактор Хетæгкаты Оксанæ, сæрмагонд операцийы архайджытæ Тыбылаты Энвер æмæ Хъайырты Тимур, Уæрæсейы Хъæбатыр Абайты Юри, Горæтгæрон районы Ныхасы сæрдар Дзуццаты Валери, Абайты Сулико, поэт Касаты Батрадз æмæ æндæртæ. Уыдон се 'ппæт дæр дзырдтой ацы фембæлды нысаниуæгыл, уымæн æмæ канд хæстон архайджытæн, спорты æмæ ахуыры раззагон фæсивæдæн кад кæнынæн нæу, фæлæ ма цæмæй царды уæрæх фæндагмæ цы кæстæртæ акъахдзæф кæндзысты, уыдон дæр сæ куыд фæзмой, дарддæр дæр æнтысджынæй размæ куыд цæуой.

Мадзалмæ кæй фæхудтой, уыцы хæстонты, спортсменты æмæ ахуыры раззагдæрты схорзæхджын кодтой Иры Стыр Ныхасы Кады грамотæтæ, Арфæйы гæххæттытæ æмæ зынаргъ лæвæрттæй.

Гасситы Моисей