Нæ районы Октябрыхъæуы бынæттон администраци Пухаты Вячеславы сæргълæудæй архайы хъæу рарæсугъд кæныныл, æмæ йын æнтысгæ дæр кæны.

Карцайы трассæйæ Октябрыхъæумæ æрбахизæн кæм ис, уым арæнгæрон фæндаджы дыууæ фарсы администрацийы хъæппæрисæй æвæрд æрцыд дыууæ статуйæйы нарты кадджыты архайджыты фæлгонцтæм гæсгæ – "Хæстонтæ – фæткхъахъхъæнджытæ". Хорз рафидыдтой, бæлццæттæ сæ фендæй исынц эстетикон æхцондзинад.

Ацы фæлгонцтæ администраци йæхи æхцайы фæрæзтæй саразын кодта æмæ сæвæрдта. Уыцы хъуыддаджы сын баххуыс кодтой Хъараты Витали, Гæджынты Владимир, Къæбулты Жорик, Уалыты Руслан, Дзгойты Эльбрус, Хуыгаты Алан æмæ Батраз, уæзтæисæн машинæйыл кусæг Туаты Витали, стæй Ирыстойнаг уынджы фæсивæд. Фæсте нæ фæлæууыдысты администрацийæн йæхи кусджытæ дæр.

Октябрыхъæуы бынæттон администрацимæ хатыдысты хицæн уынгты цæрджытæ, цæмæй сын сæ сывæллæттæн саразой хиирхæфсæн фæзуæттæ. Уыцы домæн дæр æххæст æрцыд. Сывæллæтты хъазæн фæзуæттæ уал администраци йæхи бюджеты хардзæй сæвæрдта Хмельницкийы æмæ Уæлахизы уынгты, стæй Тарскæйы æмæ Хетæджы-фырты уынгтæ æмарæн кæм кæнынц, уыцы тигъыл (къамы). Ныр ацы фæзуæтты кæстæр кар фæлтæр сæ рæстæг æрвитынц райгондæй, сæ ныййарджытæ та бузныг сты, чи сæ бацæттæ кодта, уыдонæй.

Бынæттон администрацийы сæйраг специалист Джергаты Алан мын афтæ зæгъы:

– Мах нæ фадатмæ гæсгæ дарддæр дæр архайдзыстæм нæ хъæуы фæлгонцадыл, кæстæр кар фæсивæды хиирхæфсæн бынæттæ фæфылдæр кæныныл, æмæ мæ ныфс ис, кæй нын бантысдзæн.

ГАССИТЫ Моисей