Хуссар Ирыстоны Цхинвалы дуры куыстгæнæн завод Цæгат Ирыстоны байгом кодта базарадон хæдзар. Ныр "Алайнаг дур" ахызт фæсарæйнаг базарадмæ. Йæ генералон директор у Коцты Эльбрус.

Хуссарирыстойнаг æнæххæст бæрнондзинады æхсæнад "Импульс"-ы базарадон хæдзар "Алайнаг дур" Дзæуджыхъæуы кусдзæн æппæт Уæрæсейы регионтæй дæр потенциалон æлхæнджыты æргом аздахыныл, æмæ цæттæ продукци ласдзысты Уæрæсемæ.

Ацы завод 2025 азы уалдзæджы йæ филиал байгом кæндзæн Дамаскы дæр. Уый тыххæй сириаг партнертимæ ныртæккæ цæуы баныхас. Компани цæттæ кæны æнæмæнгхъæугæ документты пакет Сирийы йæ дæлхайад байгом кæныны фæдыл. Ацы бæстæйы хъуыддагон адæймæгтæ цымыдис кæнынц проекты æнтыстджын реализацийыл. Филиалы бындурон хæс у Æввахс Скæсæны бæстæты партнертимæ хъуыддагон æмæ профессионалон бастдзинад саразын.

Филиал байгом кæныны инициатор уыд Сири, йæ минæвæрттæ суыдзысты официалон дистрибьютортæ. Хуссар Ирыстонæй уырдæм æрвитдзысты цæттæ продукци. Дамаскаг сæрмагонд клиенттæ æмæ организацитæн сæ бон уыдзæн ацы заводы продукци æлхæнын. Сирийы филиал куы байгом уа, уæд заводæн фадат уыдзæн ацы бæстæйы егъау промышленнон равдыстыты архайынæн.

Хуссарирыстойнаг дуры куыстгæнæн куыстуат официалонæй байгом уыдзæн, æххæст хъомысадæй куы скуса, уæд – фидæн азы уалдзæджы. Куыд загътон, афтæмæй продукци реализацигонд цæуы бренд "Алайнаг дур"-æй.

Заводы нырма кусы 45 адæймаджы, пълангонд та у 110 кусæн бынаты. Йæ фыццаг продукци завод рауагъта ацы аз сентябры мæйы. Сцæттæ кодта бордюртæ æмæ брусчаткæ Цхинвалы 13 коммунары номыл уынджы Стыр Леуахийы сæрты хиды арæзтадæн, стæй поселок Дзауы доннуазæн фонтанæн архитектурон æрмæджытæ дæр.

Заводы разамынд баныхас кодта уæрæсейаг компанитимæ, товартæ сæм кæй ласдзæн. Ныртæккæ дуры куыстгæнæн завод кусы, горæт Беслæнæй сæм цы заказ ис, уый сцæттæ кæныныл.

ГАССИТЫ Моисей