1 декабры Дзæуджыхъæуы йæ куыст райдайдзæн Ирон адæмы XI съезд. Бæрæг куыд у, афтæмæй фæстаг, X съезд ацыд 2018 азы Хуссар Ирыстоны горæт Цхинвалы. Уый фæстæ XI съезд хъуамæ уыдаид 2022 азы, фæлæ бæрæг аххосæгтæм гæсгæ фæстæдæрмæ æргъæвд æрцыд.

X съездæй XI съезды 'хсæн Æппæтдунеон æхсæнадон змæлд "Иры Стыр Ныхас"-ы Координацион советы сæрдар ссис Уататы Зелим, Хуссар Ирыстоны 'рдыгæй та – Тыбылты Леонид.

Съезды сæйрагдæр цы фарстатыл дзырд цæудзæн, развæлгъау бæрæггæнæнтæм гæсгæ, уыдон сты Ирыстоны дыууæ хайы баиу кæнын, ирон бафæзминаг æгъдæуттæ, мадæлон æвзаг бахъахъхъæнын, демографийы фарст, аивадон совет саразын, ирон бæрæгбæттæ æмхуызон, иу бон нысан кæнын. Ирон бæрæгбæтты къæлиндар иухуызон саразыны тыххæй та ацы хъуыддагмæ бар чи дары, уыцы ахуыргæндты æрбахонын, цæмæй сæ хъуыдытæ зæгъой ирон къæлиндар саразыны тыххæй, кæннод æй схæццæ кæнынц. "Иры Стыр Ныхас"-мæ фылдæр æрбакæнын хъæуы фæсивæд.

Дзырд ма дзы цæудзæн æндæр фарстатыл дæр.

Цæгат Ирыстоны Национ политикæ æмæ æддагон бастдзинæдты министрад сараздзæн съезды æппæт архайджытæн форум ахæм темæйæ: "Æмфыдыбæстонты консолидаци куыд дунейы фидардзинад".

Съезмæ æрцæудзысты ирон национ-культурон æхсæнæдтæ æмæ диаспорæты минæвæрттæ куыд Уæрæсейæ, афтæ фæсарæнтæй дæр. Æз фембæлдтæн Горæтгæрон районы Ныхасы сæрдар Дзуццаты Валериимæ æмæ мын афтæ радзырдта:

– Ирон адæмы XI съезд æрæгмæ уагъд кæй цыд, уый уыд Уæрæсейы сæрмагонд æфсæддон операцийы фæстиуæг сæйрагдæр. Нысан дæр-иу скодтам съезд ауадзыны бон, фæлæ-иу нæ цыдæртæ бакъуылымпы кодтой. Ныр, Хуыцауы фæндæй, сбæрæг йæ ауадзыны бон бæлвырдæй – 1 декабрь. Уымæ бацæттæ кæнынмæ нын кæд чысыл рæстæг баззад, уæддæр бацархайдтам съездимæ баст фарстытæ æрбæстон кæныныл.

Нæ районæй ацы форумы архайдзæн 50 делегаты. Ныфс мæ ис, кæй суыдзæн ирондзинад дарддæр парахат кæныны, хæлардзинад æмæ æфсымæрдзинады раздзæуæг.

Съездмæ бацæттæ кæныны тыххæй ивгъуыд къуыри нæ районы Ныхас дæр ауагъта æмбырд. Архайдтой, раныхас дзы кодтой Ирыстоны "Стыр Ныхас"-ы разамонджытæ. Фæстæдæр, 26 ноябры, Дзæуджыхъæуы уыд "Стыр Ныхас"-ы Координацион советы æмбырд, æмæ уым бæстондæр æркастысты, съезды цæуыл дзурдзысты, уыцы фарстытæм, сфидар кодтой боны фæтк, регламент".

Уæдæ нын фарны æмбырд фæуæд!

ГАССИТЫ Моисей