Мæскуыйы 2024 азы мыхуыры рацыд журналисттæ æмæ фысджытæ Захар Прилепин, Олег Демидов æмæ Алексей Колобородовы егъау, гуырахстджын чиныг "Жизнь за други своя". Дзырд дзы цæуы Уæрæсейы сæрмагонд æфсæддон операцийы архайджытыл. Чиныг рухс федта Захар Прилепины хæрзаудæн фонды фæрцы ахæм серийæ – "Фыдыбæстæ хъахъхъæнæг".

Тынг хъæугæ у ацы чиныг: цы бирæ æрмæджытæ æмæ дзы къамтæ ис, уыдон ахъазгæнæг сты фæсивæды патриотон хъомыладæн, разæнгард сæ кæнынц Фыдыбæстæ уарзынмæ. Алы æрмæг дæр у цымыдисон æмæ дзуры хицæн хъайтарты тохты хабæрттыл. Уыцы хъæбатыртæ та сты алы адæмыхаттыты хæстон лæппутæ æмæ чызджытæ. Уацтæ, æрмæджытæ фыст сты алыхуызон жанрты, æмæ уый хъæздыгдæр кæны чиныг.

Ацы чингуытæй нæ районы центрон библиотекæйæн балæвар кодта фонд "Фыдыбæстæ хъахъхъæнæг"-ы Горæтгæрон районы хайад. Скодтой дзы презентаци чиныгдоны кæсæндоны. Йæ бацæттæгæнджытæ уыдысты библиотекæйы директор Къæбулты Галинæ æмæ библиограф Хуыгаты Ритæ.

Райдианы Къæбулты Галинæ бузныг загъта æрбацæуджытæн, стæй чиныг чи балæвар кодта, уыдонæн. Уымæн æмæ зынаргъ æрмæджытæй конд у æмæ библиотекæйæн та бæрæгбоны хуызæн у.

Цы адæм æрбамбырд мадзалмæ, уыдон та уыдысты: фонд "Фыдыбæстæ хъахъхъæнæг"-ы Горæтгæрон районы координатортæ Темыраты Аленæ æмæ Тохъмайты Илонæ, хæстон архæйдтыты ветеран Аслан Сагитов, спорты архайджытæ, Камбилеевкæйы хъæуы фыццаг астæуккаг скъолайы дæсæмкъласонтæ – æвзонг пъæлицæйæгтæ, культурæйы къабазы кусджытæ, æндæр адæм.

Ацы чиныджы ахадындзинад æмæ авторты цард æмæ куысты тыххæй радзырдтой Темырты Аленæ, Къæбулты Галинæ, библиотекæйы кусæг Зассеты Светæ æмæ æндæртæ. Се 'ппæты хъуыды дæр иу уыд: чиныг фæрæстмæ, сæмбæлд йæ нысаныл, чи йæ бакаст, уыдон ын аргъ кæнынц. Уый фæстæ библиотекæйы кусджытæ дзырдтой чиныгæй эпизодтæ, скъуыддзæгтæ, бакастысты дзы хицæн æрмæджытæ. Равдыстой видеоролик дæр, сæрмагонд операцийы чи архайдта æмæ архайы, уыдонæн сæхи, сæ бинонты тыххæй.

Чиныджы автортæй иу – Захар Прилепин – бирæ уарзы Гæздæнты Гайтойы сфæлдыстад, уыдис Цæгат Ирыстоны дæр – Беслæны, Намысы аллейæйы, уырыссаг театры. Цы уацмыстæ мыхуыргонд ис чиныджы, уым дзырд цæуы цæгатирыстойнаг хæстон Радийы хъæбатырдзинады тыххæй дæр.

Презентацийы уыд райадминистрацийы Культурæйы управленийы хицау Табуты Георги дæр.

ГАССИТЫ Моисей