Куыд бæрæг у, афтæмæй Цæгат Ирыстоны Горæтгæрон районы сырæздзæн горæт-спутник. Комплексон арæзтад хуындзæн "Дæлвæз Симд". Ирон традицион фыдæлтыккон кафты ном ыл уымæн сæвæрдтой, æмæ йæ арæзтæдтæ кæрæдзийы фарсмæ уыдзысты, цыма ленк кæнынц, афтæ.

Проектмæ гæсгæ, суинаг горæт сырæздзæн Ногиры хъæумæ æввахс, Теркмæ хæстæг. 265 гектарыл сараздзысты иу милуан квадратон метры хæдзæрттæ 36 мин цæрæгæн. Уыдон уыдзысты 5–9-уæладзыджынтæ. Социалон инфраструктурæйы уыдзæн æртæ скъолайы 1250–1600 бынатимæ, æхсæз та – сывæллæтты рæвдауæндæттæ. Уымæй уæлдай ма – поликлиникæ, уазæгдон, физкультурон-æнæнизгæнæн комплекс бассейнимæ, футболон, теннисон академитæ, 50 гектарыл та – паркон фæзуат. Цæудзæн æм æхсæнадон транспорт, уыимæ трамвай дæр.

Æрæджы Цæгат Ирыстонмæ æрцыд Уæрæсейы Федерацийы Арæзтады æмæ цæрæнуатон коммуналон хæдзарады министры фыццаг хæдивæг Георги Ломакин, æмæ йын скодтой ацы комплексон арæзтады ног проекты презентаци. Ног горæт аразын райдайдзысты 2025 азы кæрон.

ГАССИТЫ Моисей