Ивгъуыд дыццæджы нæ районы сывæллæтты сфæлдыстады Хæдзары арæзт æрцыд районы конкурс «Иры фидæн». Районы алы хъæутæй сæ арæхстдзинад равдыстой цымыдисаг номинациты «Хуыздæр аив кæсæг» æмæ «Аив уацмысты хуыздæр инсценировкæ» 50 сабийæ фылдæр (3 азæй 7 азы онг).

Хъæлдзæг мадзал амыдта Багаты Аллæ, Михайловскы 20-æм рæвдауæндоны ирон æвзаг æмæ литературæйы ахуыргæнæг. Курдиатджын сабитæн тæрхон кодтой жюрийы уæнгтæ: Хъуылымбегты Людмилæ – районы ахуыргæнджыты Профсоюзы сæргълæууæг, Цхуырбаты Ася – Октябрыхъæуы 1-æм скъолайы ирон æвзаджы ахуыргæнæг, Бететы Евгения – Ногиры 2-æм скъолайы ирон æвзаджы ахуыргæнæг, æмæ Казиты Фатимæ – Октябрыхъæуы 2-æм скъолайы ирон æвзаджы ахуыргæнæг.

Конкурс арæзт æрцыд районы ахуырады управленийы хъæппæрисæй, бацæттæ йæ кодта Годжыцаты Аленæ – районы ахуырады Управленийы сæйраг специалист.
Конкурсы фыццаг хайы сабитæ аивæй бакастытсты æмдзæвгæтæ. Се ‘ппæтæй дæр зæрдæ рухс кодта, кæд дзы иуæй-иутæ чысыл къуыхцы кодтой, уæддæр. Кæй зæгъын æй хъæуы, жюрийы уæнгтæн тынг зын равзарæн уыд хуыздæр кæсджыты, фæлæ иумæйагæй æрцыдысты ахæм хатдзæгтæм: 1-аг бынаты аккаг сси Джиоты Артур - Ногиры 12-æм рæвдауæндонæй; 2-аг бынат адих кодтой – Тедеты Елизаветæ, Октябрыхъæуы 3-æм рæвдауæндонæй æмæ йе ‘мхъæуыккаг Къæбысты Дианæ, 10-æм рæвдауæндоны хъомылгæнинаг; 3-аг бынат та бацахстой Æрсойты Дзамболат 2 рæвдауæндонæй Сунжæйы хъæуæй æмæ 20-æм рæвдауæндонæй Михайловскы хъæуыккаг Дзгойты Арсæг. Мæнмæ гæсгæ ма тынг зæрдæмæдзæугæ бакаст Урымты Петкæйы æмдзæвгæ «Тæрхъус» Тарскæйы 13-æм рæвдауæндоны саби Тедеты Сæрмæт – ууыл дзурæг уыд æрбацæуджыты зæрдæ куыд бахъæлдзæг кодта йæ дзардыгъæдæй, йæ артистон фезмæлдæй. Хорз бакаст Черменаг лæппу 9-æм рæвдауæндонæй Цакъойты Георгий Плиты Харитоны æмдзæвгæ «Мадмæ».

Мадзалы дыккаг хайы та - «Аив уацмысты хуыздæр инсценировкæ»-йы номинацийы нæ чысыл хуртæ равдыстой цыбыр театралон сценкæтæ зындгонд ирон аргъæуттæй. Бирæтæ дзы афтæ тынг дæсны ахъазыдысты сценæйыл, æмæ-иу адæм сæ къухæмдзæгъдæй нал лæууыдысты. Инсценировкæты равдыстты æхсæнмæ-‘хсæнты залы адæммæ æмæ жюрийы уæнгтæм амонæг лæвæрдта фарстатæ ирон тырысайы тыххæй - цы нысан кæны, йæ алы хуыз; бæгæны куыд фæзынд æмæ æндæртæ. Ноджы ма сæ ирхæфста уыци-уыцитæ æмæ æмбисæндтæй.
Ацы номинацийы æдæппæтæй архайдтой 6 рæвдауæндоны, уыдонæй сæ тæккæ хуыздæрыл нымад æрцыдысты Октябрыхъæуы №15-æм рæвдауæндоны сабитæ (Джимиты Кларæйы аргъау «Арс цуанонмæ уазæгуаты куыд цыд» иттæг хорз равдыстой). Дыккаг бынат адих кодтой Камбилеевкæйы хъæуы 1-æм рæвдауæндон æмæ Октябрыхъæуы 10-æм рæвдауæндæттæ. Æртыккаг та – Сунжæйы хъæуы 2-æм рæвдауæндон æмæ Архонкæйы 16-æм рæвдауæндон. Банысан кæнын хъæуы уый дæр, æмæ архонкæйаг конкурсанттæ кæй уыдысты уырыссаг сабитæ, фæлæ хорз зонындзинад равдысой сæ аив ирон дзырдæй, се змæлдæй.

Конкурсы кæрон арфæйы ныхæстæ архайджытæн, ныййарджытæн æмæ хъомылгæнджытæн загъта Бететы Евгения. Бузныджы ныхæстæ ма загъта Годжыцаты Аленæ Волохова Людмилæйæн - сывæллæтты сфæлдыстады хæдзары директорæн, æрвылаз сæм йе ’ххуысы къух кæй бадары, уый тыххæй.
Нæ курдиатджын чысыл хурты бабуц кодтой зæрдылдарæн лæвæрттæй æмæ грамотæтæй. Районы конкурсы уæлахиздзаутæ дарддæр дæр, мартъийы кæрон архайдзысты республикон конкурсы.
Сæ къухы бафтæд уæлахиздзауы ном! Ахæм сабитæ æнæмæнг сты Ирыстоны фидæн æмæ ныфс.
ÆЛБОРТЫ Азæ.
ХУЫГАТЫ Анжелæйы ист къамтæ.