Рагæй нырмæ дæр сыгъдæгдзинад æнæниздзинады хос хонынц. Æмæ уый раст у. Фыдæлтæй нын баззад: сыгъдæг хъуамæ уæм нæ хæдзæртты, кусæндæтты, улæфæн бынæтты, уынгты…

Фæстаг рæстæг нæ районы фылдæр хъусдард цæуы хъæуты санитарон уавæрмæ. Уый тыххæй бынæттон администрацитæ афæдзы дæргъы цалдæр хатты саразынц зиуы бонтæ.
Нæ районы «Ныхас»-ы организацион структурæйы ис санитарон уавæры æмæ хæрзарæзтады комитет. Уый æрвылаз дæр саразы рейдтæ хъæуты сыгъдæгдзинады фæдыл. Иу ахæм рейд уыди ивгъуыд дыццæджы. Рейды архайдтой комитеты уæнгтæ Бæзаты Владимир, Биазырты Хъауырбег, Битеты Алихан, ацы рæнхъыты автор æмæ районы «Ныхас»-ы сæрдар Ходы Æхсар.
Фыццаг бабæрæг кодтам Сунжæйы хъæу. Федтам сæйраг æмæ фæрсаг уынгтæ дæр, æмткæй райсгæйæ сты сыгъдæг, уæлмæрдтæ дæр – афтæ. Нæ зæрдæ барухс.
Сунжæйы сæйраг – Бибылы-фырты номыл уынджы хъæуы æнæххæст астæуккаг скъолайы ахуыргæнинæгтæ се скъоламæ æввахс сыгъдæг кодтой тротуар, бордюртæ ахуырстой (фыццаг къамы). Семæ уыдысты директор Хуыгаты Æхсар æмæ ахуыргæнæг Зассеты Мурат.
Скъоламæ æввахс Ватутины уынгыл ис донцæуæн къанау, Бибылы-фырты номыл уынгмæ кæм æрбахизы, уым тынг у æрдæг арæзт, æмæ уый æвидыц кæны дыууæ уынджы дæр.
Дарддæр бабæрæг кодтам Комгæроны хъæу. Иннæ хъæутæй хъауджыдæр Комгæрон у сыгъдæгдæр, суанг фæсфæд бынæтты дæр. Бæрæг у, ам сыгъдæгдзинады бонтæ кæй сарæзтой, уый. Сæйраг æмæ æппæт уынгтæ дæр сты æфснайд, хицæн цæрджытæ дæр сæ хъус хорз дарынц сæ хæдзæртты рæзтæм.
Хъæуы уæлмæрдты баййæфтам цæрджытæ Джыккайты Азæ æмæ Фатимæйы. Уыдон домдтой, цæмæй газет «Фидиуæг»-ы фæрстыл бузныг зæгъæм администрацийы сæргълæууæг Туайы-фырт æмæ уæлмæрдтæ ныссыгъдæг кæныныл чи бакуыста, уыцы адæмæн. Зæгъынц, афтæ сыгъдæг æмæ æфснайд, хæрзкуыст никуы ма уыдысты.
Дæрддтыл у Камбилеевкæйы хъæу. Ис дзы фæрсырдæм æмæ дæргъæй-дæргъмæ дæр бирæ уынгтæ. Ацыдыстæм сыл æмæ та ам дæр – сыгъдæг, æфснайд. Бынæттон администраци, скъолатæ, адæм хорз бакуыстой уæлмæрдтæ ныссыгъдæг кæныныл, йæ быру йæ йын хуызджын ахорæнтæй сахуырстой. Хъæубæстæ сæ хъус хорз дарынц сæ хиуæтты ингæнтæм. Æрмæст раст нæу, хъæуы сæйраг уынджы фæндаджы был хæлд техникæ кæй лæзæры (æртыккаг къамы) бирæ рæстæг, уый.
Федтам Куырттаты æмæ Дачнæйы хъæутæ дæр. Уымыты дæр у сыгъдæг фау æрхæссæн нæй, хицæн  чысыл хъуыддæгтыл куынæ дзурæм, уæд. Фæлæ Дачнæйы хъæуы цæрæн корпусты цур калд уыд бирæ бырæттæ (цыппæрæм къамы). Хъæуы бынæттон администрацийы разамынд нын загъта, ацы бынат кæй ссыгъдæг кæндзысты.
Рейды архайджытæ æрцыдысты ахæм хатдзæгмæ: æмткæй сисгæйæ цыппар хъæуы дæр хъахъхъæд цæуынц санитарон нормæтæ. Æрмæст алы хъæуы хицæн хæдзæртты раз дæр ис арæзтадон æрмæджытæ калд.
Рейды рæстæг немæ архайдтой хъæуты бынæттон администрациты сæргълæуджытæ, иннæ кусджытæ, «Ныхас»-ты уæнгтæ æмæ ныфс  бавæрдтой, дарддæр дæр кæй кусдзысты сæ хъæуты сыгъдæгдзинад æмæ хæрзарæзтадыл. Бантысæд сын.
ГАССИТЫ Моисей.
Авторы ист къамтæ.