Хуссар Ирыстоны Цхинвалы байгом Уæрæсейы Хъæбатыр, Цæцæны Республикæйы фыццаг президент АхматХаджи Кадыровы номыл паддзахадон аивæдты скъола. Байгом æй кодтой республикæ расидыны 35 азы юбилейы бонмæ.

Ардæм æрбацыдысты Президент Гаглойты Алан, республикæйы Уæрæсейы Федерацийы æххæстбарджын минæвар Марат Кулахметов, культурæйы министр Зæгъойты Радæ, Цæцæны Республикæйы делегаци национ политикæйы, æддагон бастдзинæдты, мыхуыр æмæ информацийы министр Ахмед Дудаевы сæргълæудæй.

Ацы социалон объекты арæзтады уынаффæ ист æрцыд ивгъуыд азы июны мæйы, республикæйы Президент Гаглойты Алан æмæ Цæцæны Республикæйы Сæргълæууæг Рамзан Кадыровы фембæлды рæстæджы. Социалон объект у Рамзаны стыр лæвар Хуссар Ирыстонæн æмæ реализацигонд цæуы Ахмат-Хаджи Кадыровы номыл æхсæнадон регионалон фонды æххуысæй.

Аивæдты скъолайæн йæ бон у 200 сывæллоны райсын. Ифтонг у æнæмæнгхъæугæ инвентарæй, уый дæр у цæцæйнаг хæлæртты лæвар.

Цытджын церемонийы ма арфæйы ныхæстæ загътой Марат Кулахметов, аивадон скъолайы разамонæджы номæй – Джиоты Къоста.

Хореографион скъоластуди цытджын æгъдауæй байгом кодтой Гаглойты Алан, Зæгъойты Радæ, Ахмед Дудаев æмæ Марат Кулахметов. Уыдон ма азылдысты бæстыхайы.

Аивæдты скъола кæй байгом Цхинвалы, уый фидар бындур æвæры сывæллæтты аивады рæзтæн æмæ рæзгæ фæлтæры сфæлдыстадон потенциал раргом кæнынæн. Сæ къухы æфтдзæн ног аивадон æнтыстдзинæдтæ.

Хореографион скъоластудийы директорæй нысангонд æрцыд Хуссар Ирыстон æмæ Абхазы сгуыхт артист Майя Четион.

ГАССИТЫ Моисей