Нæ районы администрацийы æмбырдтæаразæн залы уыд Уæрæсейы Федерацийы коммунистон партийы Горæтгæрон районы бынæттон хайады XVI-æм хыгъдон–æвзарæн конференци. Архайдтой дзы Уæрæсейы Паддзахадон Думæйы депутат Тайсауты Хъазбег, Цæгат Ирыстоны Парламенты депутат, компартийы Цæгат Ирыстоны рескомы фыццаг секретарь Дудайты Чермен, Горæтгæрон районы сæргълæууæг Гаглойты Алан.

Конференци амыдта компартийы Горæтгæрон райкомы фыццаг секретарь Биазырты Фатимæ. Æмбырды райдианы нæ районы Сæргълæууæг Гаглойты Алан хорзæхгонд æрцыд Уæрæсейы компартийы центрон советы уæлдæр хæрзиуæг – Æфсымæрон адæмты цæдисы орденæй. Радта йын æй Тайсауты Хъазбег. Нæ районы цæрджыты Арфæйы фыстæгæй та Гаглойы-фырт схорзæхджын кодта Тайсаты-фырты. Зассеты Иринæйы райстой компартийы рæнхъытæм æмæ йын радтой партбилет.

Ацагъта Уæрæсейы Гимн, æмæ райдыдта конференци.

Боны фæткы уыд ахæм фарстатæ: 2024 азы 24 июнæй 2026 азы 29 апрелмæ компартийы нæ районы бынæттон хайады хыгъд; контролон-ревизион къамисы хыгъд; комитеттæ, секретариаттæ, мандатон æмæ нымайæн къамистæ сæвзарын, компартийы республикон конференцимæ делегаттæ сæвзарын, æндæр фарстатæ.

Делегаттæ снысан кодтой конференцийы кусæгон органтæ.

Фыццаг фарстайы фæдыл хыгъдон докладимæ радзырдта Биазырты Фатимæ. Уый фæстæ раныхас кодтой Тайсауты Хъазбег, Гаглойты Алан, конференцийы кусæгон къамисты сæрдартæ, Магомед Батажев, Чысиаты Мæирбег æмæ æндæртæ. Æвзæрст æрцыдысты компартийы республикон хыгъдон-æвзарæн XXXVII-æм конференцимæ делегаттæ, компартийы райкомы сконд, секретариат, мандатон æмæ нымайæн къамистæ. Компартийы Горæтгæрон райкомы фыццаг секретарæй делегаттæ ногæй сæвзæрстой Биазырты Фатимæйы.

Дзырд ма дзы цыд æндæр фарстатыл дæр.

ГАССИТЫ Моисей, конференцийы делегат