Æнæххæст бæрнондзинады æхсæнад "Еврострой" (йæ хицау Дзеранты Сослан) Камбилеевкæйы хъæуы сæйраг - Кучийы-фырты номыл - уынджы райдыдта зæронд бордюртæ ногтæй ивыны куыстытæ. Уый фæстæ та уынджы зæронд асфальты цъар сисдзысты æмæ йæ ног асфальтæй бамбæрздзысты.

Арæзтады мастер Цхуырбаты Олег мын радзырдта:

- Кучийы-фырты номыл уынджы райдайæнæй бордюртæ раивдзыстæм 300 метры бæрц. Ацы дæрддзæджы ма уынджы галиуварс, æхсæнадон агъуыстыты æмæ чысыл скверты цы зæронд бордюртæ æвæрд ис, уыдон дæр скалдзыстæм æмæ дзы ногтæ нывæрдзыстæм, æдæппæтæй - 600 метры бæрц. Уыцы куыстытæ кæронмæ куы сæххæст кæнæм, уæд уынг кæрæй-кæронмæ бамбæрздзыстæм асфальтæй. Кусынæн бæзгæ бонтæ кæд ахæсса, уæд нæ хæс афойнадыл сæххæст кæндзыстæм.

Ныртæккæ куыстыты архайынц тракторыл кусæг Джиголаты Таймураз, хицæн куыстытæ æххæстгæнджытæ Толасты Игорь, Уаниты Автандил, Бибылты Виктор, Кокойты Алыксандр, Хъæцмæзты Артур æмæ æндæртæ.